The content originally appeared on:
Diario
Transicion ‘suave’ di Aruba pa Curacao:
E ta bandona Buleria
ORANJESTAD (AAN): Informacion di Curacao ta mustra cu un cambio totalmente inespera pa ICONS; maneho di e banda ta anuncia su adkisicion di mas nobo den persona di Jair ‘Buddylove’ Versprey.
“Nos ta masha contento cu Buddylove a scohe pa ICONS. Na momento cu tabatin apertura pa un combersacion tocante di un posibel colaboracion internacional den futuro cu KJ74 Entertainment, ambos partido a yega na otro tambe pa colabora den islanan ABC.
Esaki a tuma luga den Ikoniko dia 5 di Juli cu a pasa. Primeramente e colaboracion a cuminza como un “featuring”, pero masha lihe a bin haya otro y crea un sinergia pa un colaboracion mas largo. E trayecto a cana lihe, spontaneo y totalmente inespera”, di acuerdo cu managernan di ICONS, Kenley Jansen y Efrem Mambi.
Ademas di uni cu ICONS, Buddylove lo cuminsa un trayecto internacional tambe cu maneho di KJ74 Entertainment.
Algun siman pasa ya caba Buddylove a comenta den un podcast cu e ta habri pa un colaboracion cu KJ74 y te hasta anticipa un “featuring”, sinembargo e horizontenan ta amplia aun mas tanto pa Buddylove.
“Masha dia mi mes personalmente tabata ke un cambio di scenario; Curaçao ta cerca di Aruba, cerca di cas, mi famia y mi fanaticonan. E mudansa pa Curaçao ta yega manera un aire fresco p’ami; mi gusta Curaçao un mundo y fanaticonan YDK ta lagami sinti na kas. E amor pa Aruba hamas lo cambia. Mi ta realmente entusiasma cu e comienso nobo aki,” asina Jair ‘Buddylove’ Versprey a comenta.
Buddylove ta un tremendo cantante y un interprete total! Na 2017 el a presenta fenomenalmente den Idols na Hulanda, y despues a debuta na Aruba den algun otro agrupacion musical pa despues forma parti di Buleria. Cu yegada di Buddylove den ICONS, e team ta fortifica cu un artista hoben, moderno, y versatil cu por canta di balada, te soca, y for di tumba te ritmo combina, genero musical latino y mas aya!
E prome presentacion di Buddylove den ICONS lo ta na Curaçao den “Umbrella” dia 28 di September venidero na Landhuis Chobolobo. E combinacion di Buddylove, Icons y KJ74 Entertainment por bira algo impactante pa e islanan ABC, sigur considerando e pasonan firme cu ta tumando internacionalmente.
