The content originally appeared on:
Diario
Zona di Convergencia Intertropical hopi activo ta subi cu solo
*Na 2023 Franklin a spierta Aruba cu region mester ta prepara
*Convergencia entre Caribe y Africa a forma cadena actividad
ORANJESTAD(AAN)—E imagen di satelite cu a drenta ayeratardi no a laga nada na imaginacion di loke Aruba, resto di Region di Caribe, Golfo di Mexico y Costa Atlantico di Merca por spera pa temporada 2024 di horcan.
Calor inclemente, cu e biento produci den un sistema di presion halto a alivia algun dia, a aumenta durante ayera.
Cu un temperatura cu según pronostico lo alcansa 34 grado Celsius, chens grandi ta existi cu Aruba bou influencia di un ola tropical fuerte, por spera bastante yobida, cu strena y lamper awe.
Un realidad cu ta bini dilanti den e boletin oficial di Departamento di Meteorologia di Aruba, e autoridad oficialmente encarga cu vigilancia di condicionnan di tempo.
E temporada di horcan 2023, a laga un advertencia serio atrás pa Aruba y henter mundo cu ta duda den e motibo cu mester bati alarma ora un sistema tropical ta acerca y por crece pa haya forsa di tormenta tropical.
Tormenta tropical Franklin a entrega e prueba di loke den condicionnan favorabel mester wordo vigila na e momento cu el a dicidi pa su mes, y a cambia di rumbo.
Tabata wordo spera cu e lo a dal un vuelta bay ariba y asina afecta e parti Noord di Caribe.
Sinembargo, si el a sigui e ruta cu a wordo spera e lo a topa cu un sistema cu lo a afecta su forsa, loke a haci cu el a stop di move y a cuminsa zak pa asina alcansa Aruba, pa despues move bay ariba.
DIARIO na un forma continuo na 2024, a adverti Aruba pa e realidad di e temporada 2024, cu awe riba e imagen di satelite di Oceano Atlantico, region di Caribe y Golfo di Mexico, ta duna un bon impresión di loke por spera.
Cu mester vigila e situacion actual continuamente, ta mas cu claro, pero tambe mester mira kico tin na caminda.
E Departamento di Meteorologia di Aruba den su boletin oficial a anuncia e ola tropical, cu lo afecta Aruba cu yobida cu por ta pisa y cu posibel presencia di strena y lamper.
E portret di satelite di ayera, ta duna un indicacion di actividad di e Zona di Conferencia Intertropical pisa entre e continente Sud Americano y e continente Africano.
Na e momentonan aki, solo a cuminsa subi y asina tambe e Zona di Convergencia Intertropical den cual e sistemanan tropical ta nace.
Un imagen hopi expresivo di actividad tropical cu ta ta subi hunto cu e Zona di Convergencia pa produci areanan pisa di mal tempo pa e region di Caribe, Golfo di Mexico y e costa Atlantico di Merca.
E imagen na inicio di e temporada di horcan, ta mustra cu Aruba mester ta prepara. Mester tene cuenta cu como solo sigui subi, e linea di nubianan cu por mira awor aki poco mas pa Zuid di entrada di region di Caribe, ta sigui subi mientras solo tambe ta biaha bay Noord.
Informantenan den otro sectornan cu ta atende directamente cu e problemanan cu por surgi den yobida pisa a splica DIARIO, cu comunidad mester ta prepara pa e temporada pero cu tambe mester siguii guia cu ta wordo duna dor di autoridad encarga cu diferente angulo cu por presenta den e temporada di horcan.
Aki a wordo mustra riba problemanan serio cu mester evita na propiedadnan cu por wordo afecta pa condicionnan di tempo inclemente.
Un asunto cu sigur tin atencion di autoridad, ta e forma cu cantidad di persona ta dicidi pa na momento cu yobida fuerte presenta, participa den trafico, cu den e condicionnan di yobidanan pisa, por ta sumamente peligroso.
“E sistemanan cu ta wordo presenta actualmente riba portretnan, ta duna indicacion cla, cu Aruba mester ta prepara pa basta yobida, cu tur resultado cu esaki por tin,” a bini dilanti. Informantenan a mustra riba e cantidad di vehiculonan cu problema tecnico cu ta bira mas peligroso den condicionnan di yobida pisa.
Pa evita problemanan serio cu ta conduci na daño material y pisa, mester tuma nota di advertencia den un comunidad cu a expande tanto cu ciudadano como cu bishitante.
E condicionnan di tempo cu a presenta ayera den region di Caribe, ta confirma e advertencianan cu a wordo duna relaciona cu un temporada di horcan hopi activo debi na cambio di clima, cu a produci un oceano cayente.
