The content originally appeared on:
Diario
Vehiculo a pega candela tambe
ORANJESTAD (AAN): Diabierna den oranan di mainta den e area di Montaña, pa ser exacto, riba e caminda nobo di asfalt net pariba di Compleho Deportivo Frans Figaroa, e chauffeur di un truck di Serlimar no a calcula haltura di un waya cu tabata colgando un poco abao y a kere cu e truck lo por pasa safe.
Pero lamentablemente esaki no tabata e caso. E truck a ranca e wayanan cu consecuencia cu algun palo di lus tambe a worde gerek cu e waya, y a ser ranca, y riba dje e wayanan di coriente a keda pega na e parti patras di e truck.
Mirando cu e wayanan ainda tabata tin coriente riba nan y nan tabata sacando chispa. Un di e chispanan aki a cay den e baki unda ta deposita e sushi y probablemente a bay den contacto cu e sushi cu tabata tin den e truck y a pega candela.. Mesora a pidi pa presencia di Polis, Brandweer y NV Elmar. Unidadnan di Bombero a yega hopi lihe na e lugar y a cuminsa combati e candela, pa asina e no sigui expande. Nan mester a saca tur e sushi for di e baki pone nan canto di caminda, pa asina evita cu e candela sigui expande y haci hopi mas daño na e truck. E dañonan material den e incidente aki tabata considerabel. NV Elmar tambe a presenta na elugar pa asina cuminsa mesora cu e trabaonan necesario.
