Dama a bisa Hues cu e ta laga su yiu di 17 aña uza marihuana pa e keda trankil

Den caso di menaza cu arma

ORANJESTAD (AAN): E hoben masculino S.H. di 17 aña, riba Diahuebs mainta a presenta dilanti Hues pa e casonan penal cu Ministerio Publico a cuminsa contra dje.

   Fiscal a haya S.H. culpabel di a forza un homber entrega su smartphone door di mustra un machete y tambe di a menaza un dama cu un arma di aire cu ta parce un revolver di berdad. Fiscal a exigi castigo combina y bou guia di Reclassering. Hues a confirma e castigo.

   Menaza cu arma: Den sala di Corte tabata presente e mayornan di S.H. Hues a cuminsa puntra S.H. di e ladronicia cu violencia na October 2022, caminda el a forza un ciudadano pa dun e su smartphone. S.H. a admiti pero no ta corda con el a sosode.

   Hues a mustra cu for di e raport di Polis por compronde cu S.H. a bay riba un ciudadano y exigi pa dun e su smartphone.  Sinembargo ora e ciudadano a nenga, S.H. a lanta su flanel y mustra e homber cu e tin un machete. E ora ey e ciudadano a duna e smartphone.  Den e caso aki, S.H. tambe ta worde acusa di posesion di un machete riba caya.

   E otro caso tabata dia 1 September 2023, caminda S.H. a menaza e dama K. cu un arma di candela. Tambe e ta worde acusa di posesion di e arma di candela. Polis a detene S.H. mientras cu e tabatin e arma cun’e. A resulta cu ta un revolver di aire cu ta parce un arma di candela. S.H. ta worde acusa tambe di posesion di un arma di candela.

   Hues a bisa S.H. cu e revolver di aire ta worde considera como arma di candela. Hues a puntra S.H. pakico e tabata cana cu e arma. S.H. cu cabez abao a bisa Hues cu “ta normal”.

   Hues a remarca cu esey no ta un smartphone cu bo ta cana cu ne. Hues a bisa cu S.H. a expresa: “Awor boso ta bay h…. Mi ta bay tira boso”. Hues a bisa cu e ta considera esey como menaza. Segun S.H., un hende a menace cu un revolver 38 y pesey el a dicidi di busca un arma.

   Dama ta laga su yiu huma marihuana: Durante interogacion di Hues ta sali na cla cu S.H. ta uza marihuana tur dia. Hues a puntr’e si e ta un adicto. S.H. a bisa cu e no ta un adicto.

   Hues a pidi e empleado di Reclassering cu tabata presente den sala di Corte, pa duna mas informacion riba nan evaluacion. E funcionario di Reclassering a splica Hues cu diferente experto a papia cu S.H.  E funcionario a recomenda pa Hues scucha e mama, kende a participa den e programanan cu su yiu S.H. mester a sigui.

   E dama a bisa Hues cu S.H. a cambia. E mama a bisa cu S.H. no ta anda mas den gang. Ora e caba di school e ta bay cas y ta huma marihuana hunto cu e otro ruman homber. Ora e mama yega cas nan ta hunto te ora S.H. bay drumi. E mama a bisa cu ainda e ta mira cu S.H. tin rabia y e ta haya cu S.H. mester di guia di psicologo.

   Hues a remarca cu psicologo ta preocupa cu e uzamento di marihuana. E mama a bisa cu e marihuana ta calma S.H. E tata a bisa cu S.H. a cambia y no ta cana den gang. E ta traha na un compania.

   Fiscal a exigi castigo combina: Fiscal a bisa cu e ta haya legalmente proba cu S.H. a menaza hende cu machete pa dun e e smartphone na 2022. El a mustra cu S.H. a lanta su flanel y mustra e ciudadano cu e tin un machete y si e no haya e smartphone, e lo cort’e. Esey a haci cu e ciudadano a dun e e cellular. S.H. a pasa e smartphone na un homber G., kende despues a duna e smartphone na e doño.

   E di dos caso 1 September 2023, Fiscal a bisa cu e dama K. a haci denuncia ora el a mira S.H. cu e revolver. E dama a kere cu ta un arma di berdad S.H. tabatin siendo cu e ta un revolver di aire. S.H. a menaza di lo bay tira. E revolver tabata parce un arma di candela di berdad. Fiscal a bisa cu ley ta mustra cu revolver of pistol di aire, ta worde considera un arma di berdad pasobra e ta suficiente pa causa spanto na otro persona.

   Fiscal ta haya cu esakinan ta casonan serio di menaza. Na opinion di Fiscal, S.H. tabata anda cu muchanan cu no sa kico nan tabata haci. El a hala atencion di S.H. cu e casonan aki tin castigo di prison pero Fiscal ta tene cuenta cu ta promer biaha S.H. a cay cera.

   Fiscal a mustra cu a purba duna S.H. un chens door di tene Tomzitting pero S.H. no a cumpli cu tur e exigencianan di Tomzitting. Ta pesey a dicidi di haci e caso penal.

   Fiscal a bisa cu e ta contento di scucha cu S.H. ta bay bon na school y tin un trabao. Sinembargo Fiscal ta preocupa cu S.H. ta sigui usa marihuana. El a hala atencion di S.H. cu si e sigui uza droga, a lo largo e no lo haya un trabao fiho pasobra ora haci test di droga na trabao, esaki lo tin consecuencia p’e. Fiscal ta kere cu pa e motibo aki lo ta bon pa S.H. keda bao supervision di Reclassering.

   Fiscal a usa e ley hubenil y a exigi un castigo combina pa asina pone presion riba S.H.  Aki Fiscal a exigi 360 dia di prison di cual 287 dia ta condicional cu 2 aña di prueba y bou guia di Reclassering. Tambe Fiscal a exigi un multa di 250 Florin of 5 dia sera pasobra S.H. a cana cu un machete.

   Abogado: Den su defensa, Abogado mr. D. Croes a bisa Hues cu S.H. ta un hoben ‘hopi cera’ y no ta papia. E abogado a bisa cu e famia ta bay di acuerdo cu e exigencia di Fiscal.

   Sentencia: Hues a sera tratamento di e caso y a dicta sentencia di biaha. Hues ta haya legalmente proba tur e acusacionnan y cu ta trata di casonan serio. Hues ta haya cu S.H. ta bayendo den bon direccion. El a confirma exigencia di Fiscal pero e multa, Hues a bisa cu esey ta bira condicional.

   Hues a condena S.H. na 360 dia di prison di cual 287 dia ta condicional cu 2 aña di prueba y bou guia di Reclassering. Hues a haci e multa di 250 Florin, condicional cu un tempo di prueba di 2 aña. Cu e sentencia aki, S.H. no mester bolbe bay cera.