Cerca Gobernador
*Ainda nada a keda cla di screening di futuro ministernan
ORANJESTAD (AAN): Manera cu Gobernador Boekhoudt a palabra cu e dos formadornan, e tin di haya e relato final di e formamento y tambe plan di gobernacion di Gobierno nobo riba Diahuebs 13 di Maart 2025.
Den oranan di mainta, formadornan Gerlien Croes y Mike Eman a yega na kabinet di Gobernador, awor cu ya a pasa mas di 3 luna caba desde cu comunidad a vota y a duna preferencia na tanto Partido AVP y tambe Partido Futuro pa forma e siguiente gobierno.
Sinembargo como cu ainda no a ricibi resultado di Screening di e personanan cu nan a escoge pa bira Ministro den e Gobierno nobo, nan no kier a duna informacion di esaki ora cu nan a sali for di reunion cu Gobernador.
Mike Eman a indica cu e biaha aki e proceso di Screening ta durando mas, debi cu e ley a cambia y awor ta mucho mas instancia ta participa den e proceso aki, y a hasta agrega cu ta haci un antecedenten-onderzoek mas grandi. Esaki ta prome biaha cu ta formando un gobierno bao di e ley aki, y tin di bay check con den futuro por haci algo pa e cana mas rapido.
Algo cu ni Gerlien Croes y tampoco Mike Eman no a divulga, ta e “nomber” di e gabinete nobo aki. Pues esaki tambe pa proximo simannan lo keda un secreto.
Con hopi mas lo dura e ora prome cu pueblo por haya sa kendenan ta bay bira Ministro. Eman aki a indica cu e tin e sentimento cu prome cu fin di luna nan lo ta completamente cla.
Diahuebs mainta e dos formadonan a entrega na Gobernador e prome concepto di gobernacion, y tambe a duna relato di tur e encuentronan cu gremio y organizacionnan cu nan a reuni cu nan.
Gerlien Croes di Futuro a indica cu e fin di siman aki si nan lo cuminza haci preparacion pa bay sinta cu e personanan cu lo bay bira Ministro. Pa awor toch tin di keda warda resultado di Screening, y ta diferente instancia ainda tin di haci entrega di e observacionnan aki.
