Tres Presidente di Parlamento entre September 2024 y Maart 2025
*Kico a pasa y ta pasa realmente cu loke mester ta Voz di Pueblo?
*Pakico ainda no tin un Gobierno forma pa e complot politico?
ORANJESTAD (AAN) — Democracia na Aruba ta pasa den un di su temponan di mayor seriedad hustamente na momento cu e pais a conoce su recuperacion financiero.
Contenido real di e estado democratico cu Aruba ta, ta exigi pa na e momentonan aki tur atencion wordo dedica na loke a pasa y ta pasa den Parlamento di Aruba, cu ta curazon, alma, di e sistema democratico di epais.
Ora papia di Parlamento, ta papia di e organisacion mas importante di e pais, pasobra ta Parlamento di e pais, mester garantiza e fundeshi di un Pueblo cu den libertad ta lucha pa su bienestar y bienestar di tur su ciudadanonan.
Ta hustamente pa garantiza e felicidad y bienestar di ciudadanonan, a yega na e sistema democratico pa participacion di tur ciudadano den e funcionamento di su Gobierno.
Awor atrobe mester realiza kico ta un Gobierno.
Ora uza e palabra “goberna”ta uza e forma cu hende a escoge pa un persona encabeza e liderazgo di un grupo pa asina garantiza su bon funcionamento.
E sentido di libertad, cu ta e vehiculo principal pa na un forma comunitario por percura pa e bienestar di tur persona sin distincion material of di herencia, mester por haya expresion den un Parlamento cu pa por funciona “liber” na interes di tur miembro di comunidad, ta exigi transparencia.
No mester tin pregunta serio den Pueblo, kico ta pasa tras di cortinanan politico cera, ya cu segun democracia no por existi cortina entre Pueblo di su Parlamento.
Sinembargo, na e momentonan aki na Aruba, ningun hende por comprende kico a pasa realmente den Parlamento di Aruba y a kibra e trankilidad gubernamental cu Aruba tabata conoce bou liderazgo di Gobierno Evelyn Wever-Croes, cu a produci e recuperacion milagroso di Aruba cu a bira un ehempel di bon gobernacion na interes di Pueblo, den Reino y na henter mundo y hasta den historia politico di Aruba.
Algo dramatico a pasa den tur silencio, inaceptabel pa un sistema democratico di un pais, y a bira un golpe politico di estado cu a logra manda Gobierno Evelyn Wever-Croes cas pa asina habri porta pa un Gobierno nobo, cu te ainda e originadornan di e complot no a logra forma.
E loke ta pasa den seno di gobernacion na Aruba na e momentonan aki, mester wordo cuestiona pasobra no ta normal loke a pasa Aruba ni loke ta pasa Aruba.
Con por ta posibel cu e grupo den coalicion na 2024 a forma un complot cu a pone final na un forma obvio, historico y ridiculo na e coalicion entre MEP y Raiz?
Un pregunta cu sigur mester di contesta si tene na consideracion cu tin un miembro di Gobierno Evelyn Wever-Croes, cu ta tambe dirigente di oposicion di Evelyn Wever-Croes den Parlamento di Aruba.
Pueblo mester cuminsa splicacion di tur e asuntonan historico y misterioso segun democracia, cu a y ta deszaroya den seno di Parlamento di Aruba for di 2024.
Pakico te awor e partidonan cu a haci cu Gobierno Wever-Croes mester a entrega su retiro, no por forma e Gobierno cu nan mester tabata tin na mente, ora nan a manda Gobierno Evelyn Wever-Croes cas?
Acaso ta di cualkier grupo politico, Aruba ta propiedad?
Un situacion sumamente serio, cu directamente ta mishi cu e realidad cu miembronan di Parlamento ta representa tur miembro di comunidad di Aruba y no ta un mundo riba nan mes, ta presente na Aruba.
E bienestar di Aruba ta na wega pasobra e situacion actual a paraliza e Gobierno cu a manda cas, mientras te awor no por forma un Gobierno nobo di partidonan cu a logra loke nan tabata kier cu e golpe di estado mas absurdo, cu historia di Aruba a conoce.
Aruba ta en espera di loke lo pasa den su Parlamento, cu mester funciona na interes di Aruba y caminda AVP a haya un mayoria a base di otro problema cu e no por honra y cu no ta mara na un pensamento ideologico pero na e promesa di mas placa.
Un situacion serio ta presenta su mes na Aruba, estado democratico cu no ta propiedad politico individual y pa Ley no por tin secreto pa Pueblo.
