Sunrise City Coconut Collective lanza oficialmente na San Nicolas

Epoca nobo den comunidad y creatividad

ORANJESTAD (AAN): Riba Diamars dia 4 di Maart cu a pasa, un grupo vibrante y visionario a lansa e asociacion nonprofit Sunrise City Coconut Collective (SC3) oficialmente na Scol di Arte na San Nicolas.

   E evento importante aki a marca e cuminsamento di un movecion dinamico dedica na atende e necesidadnan y interesnan di e comunidad di San Nicolas, Aruba, basa riba un aspecto amplio cu ta enfoca riba conecta e comunidad cu oportunidadnan, recurso y habilidadnan—tur esaki pa medio di participacion activo.

   E evento tabata un anochi di inspiracion yena cu energia creativo, reflexion historico poetico y discusion significante dirigi riba e posibilidad pa traha hunto pa un miho futuro pa San Nicolas. E evento a conta cu presencia di e lidernan di comunidad, NGO's, empresarionan, artistanan y inovadornan—kende tur ta personanan comprometi pa yuda San Nicolas bira un comunidad prospero y inclusivo.

   Un Vision Colectivo pa Cambio:  A ser splica cu e vision di SC3 ta: "Pa mira e comunidad di San Nicolas empodera cu conocemento y habilidad pa haya acceso na oportunidad y herment cu lo percura pa ekipa e comunidad di San Nicolas pa transforma y progresa na prosperidad social y economico."

   SC3 no ta simplemente un asociacion sin fin di lucro, e ta un movimento crea pa fomenta colaboracion entre e negoshinan local, artistanan, empresarionan social y habitantenan. Pa medio di iniciativanan strategico y den cuadro di un structura di 7 ramo cu ta influencia nos sociedad, SC3 su meta ta pa evalua e necesidadnan diversifica di e comunidad den e siguiente areanan: (*) Gobernacion & Politica, (*) Asuntonan familiar y Social, (*) Educacion & Conocemento, (*) Economia y Negoshi, (*) Religion & Spiritualidad, (*) Media & Comunicacion, y (*) Cultura, Arte & Entretenimento.

   E mision di SC3 ta pa"Cultiva Oportunidad y Conexion pa e comunidad pa por Nutri e miembronan di comunidad di San Nicolas, Yuda nan Progresa y Transforma nan den hendenan cu confiansa propio."

   Cu e mision aki, SC3 tin e obhetivo pa conecta e comunidad di San Nicolas cu oportunidad, recurso y herment necesario pa yega na confiansa propio pa medio di participacion activo. E mision ta basa riba e creencia cu transformacion sostenibel ta cuminsa cu empodera individuonan y nutri nan potencial.

E mision di SC3 ta wordo representa den e palabra abrevia (na ingles) COCONUTS. San Nicolas ta conoci como Sunrise City pasobra e ta localisa na e banda pariba di Aruba unda solo ta sali—y esaki a inspira su nomber: Sunrise City Coconut Collective abrevia SC3. E nomber ta sirbi como un afirmacion continuo y ta personifica e spirito di SC3 su mision.

   Asina SC3 ta sigui: Cu su prome hunta di directiva eligi forma pa president Zuleyka Lake-Winklaar, vice-president Indira Burke, secretario Ivor Lee, y tesorero Erika Dedier.   Como miembronan di Directiva tin Tammy Richardson, Sonny Richardson, y Tabitha Smith-Heemstadt.

   SC3 lo lansa un serie di iniciativa dirigi pa comunidad cu e intencion pa cuminsa trece diferente experto y personanan di influencia den diferente ramo hunto y evalua e necesidadnan di comunidad pa hunto nos co-crea e cambio cu nos ta desea pa mira den San Nicolas, cual na su turno lo beneficia e crecemento enonomico y social di Aruba den su totalidad

   SC3 ta invita henter comunidad pa uni  y bira parti di e movecion nobo cu ta lantando na San Nicolas.