Preparando varios actividad nacional den cuadro di celebracion di e 49 aniversario di Himno y Bandera

Comision Celebracion Dianan Nacional

ORANJESTAD (AAN): Durante un conferencia di prensa, Junior Arends di Comision Celebracion Dianan Nacional (CCDN) relaciona cu celebracion di Dia di Himno y Bandera.

Dia 18 di maart proximo, Pueblo ta celebra nos dia nacional,  Dia di Himno y Bandera, cu e aña aki lo cumpli su di 49 edicion. Un ocasion di union nacional, cu ta fortalece nos identidad, nos herencia cultural y patriotismo.

            E aña aki, un biaha mas Ministerio di Cultura hunto cu Comision Celebracion Dianan Nacional ta encarga cu eventonan oficial di Gobierno di Aruba. E tema di e aña aki ta 'Ban celebra ken nos ta, nos identidad'.

            Arends a splica cu e calendario di eventonan a cuminsa diaranson awo cu competencia di Poeta di Patria, e conocido competencia di poesia cu ta honra nos identidad cultural, cu a tuma lugar den Fort Zoutman, organisa pa Comision Celebracion Dianan Nacional hunto cu Departamento di Cultura y Fundacion Corector di Papiamento .  

            Diabierna dia 14 di maart y diadomingo 16 di maart lo tuma lugar e festival 'Un canto na nos Himno y Bandera', cu ta encera un concurso di composicionnan dedica na nos pais. E ta conta cu participacion di categoria infantil y hubenil riba diabierna. Adultonan lo competi riba diadomingo. E evento lo tuma lugar riba Plaza Libertador Betico Croes.

            Durante celebracionnan di Himno y Bandera, Comision Celebracion Dianan Nacional ta brinda e oportunidad pa nos talentonan local, expresa nan emocionnan y creatividad na Pueblo di Aruba. Y asina aki tambe duna un reconocimento y trece nos artista y baluartenan mas cerca di Pueblo, y asina hunto siña aprecia y honra nos cultura.

            Diasabra 15 di maart lo tuma lugar un anochi cultural combina cu un feria culinario, cu lo conta cu presentacionnan di tipiconan, cah'i orgel, musica, baile, kiermen un show cultural pa celebra henter e weekend nos dia nacional.

            Dialuna nan lo presenta e manifestacion cultural dedica na nos Himno y Bandera, pa 8'or di anochi lo inicia cu un show cultural, cu tambe lo inclui discurso di Minister di Cultura, Xiomara Maduro, presentacion di talentonan local y tambe lo tin un feria culinario cu mas di 40 tent. Esaki lo tuma lugar riba Plaza Betico Croes. Desde 6'or caba e tentnan lo ta habri.

            Riba dia 18 mes, lo tuma lugar e actonan protocolar y desfile, cu lo conta cu presencia di mandatarionan  y invitadonan di exterior.

            Un invitacion ta pa henter comunidad bini hunto y celebra nos dia nacional cu hopi orguyo.