‘Caribe Wave 2025’ ta hopi importante pa Aruba den cuadro di lansamento di e ‘Multi Hazard Early Warning System’

Rino Hermans di CMO:

ORANJESTAD (AAN):   Rino Hermans di Crisis Management Office (CMO) a duna di conoce durante un conferencia di prensa cu manera tur aña, den luna di maart ta tuma luga e asina yama 'Caribe Wave 2025' cu tin como meta evalua e capacidad di respuesta ora cu un tsunami tuma luga den region y cu por impacta Aruba.

            Hermans a sigui bisa cu poco tempo pasa tabata tin un teremoto cerca di Honduras cu a bay den panico pa motibo cu tabatin 'advisory' y no 'warning'. P'esey ta importante pa comunidad participa den luna di maart na un 'Caribe Wave' caminda por practica y ta mas consciente durante di haya un 'advisory' y un 'warning' y kico mester haci, el a bisa.

            E aña aki e training aki ta mas importante pa Aruba pasobra Aruba ta un di e islanan cu ta bay introduci su 'Multi Hazard Early Warning System'. Esaki ta bay ta un luna activo pa Aruba pasobra tin cu bay ricibi e proyecto. E 8 torenan cu tey un pa un tin cu sona nan y despues conhunto ta bay tin un siman ocupa cu e zonidonan ney. Despues te na 20 di maart ta wordo uza durante e training y despues di esey no lo scucha nan mes te ora cu tin un risico inminente, Rino Hermans a splica.

            Den e ultimo añanan, Aruba tabata den e top islanan cu a participa den e 'Caribe Wave', caminda e evacua scolnan, departamentonan di gobierno cu ta den e areanan di risico, pero e aña aki tin acento riba e hecho cu prensa no ta participando siendo cu prensa ta e actor principal durante un evento asina.

            Pa participa den e training mester registra di antemano, ya sea como departamento, comercio, prensa, individualnan, entre otro. Tin cinco materia cu por participa den dje.

            E training no ta tuma mas cu dos ora, pero e ta bay saca afo informacionnan hopi importante.