Situacion di tanker di petroleo MS Melenia ta estabilisa

ORANJESTAD (AAN):  Autoridadnan Local a stabilisa e situacion rond di e tanker di petroleo MS Melenia,

cu ta keda pafo di e awa territorial di Aruba. Dia 2 di maart 2025, Guarda Costa (Kustwacht Carib) a ricibi un via mail declarando emergencia for di e barco y aki nan a tuma accion inmediato pa yuda e tripulacion cu awa y cuminda.(ayudo humanitario).

            Den cooperacion cu Crisis Management Office (CMO) y Cruz Cora, un suministro di emergencia di 212 kg di cuminda y awa a wordo organiza y entrega na e tripulacion di e MS Melenia pa medio di e helicopter di Kustwacht.

            Despues di esaki, tabatin un reunion cu e Crisis Team y Crisis Management Office (CMO), pa evalua e situacion y coordina e siguiente pasonan.

            Den un periodo di 48 ora despues di e yamada di emergencia, tabata cla cu e doño di e MS Melenia ta conoci y a duna instruccion na Venezuela pa tuma cargo di e suministro di e barco. Pasobra e MS Melenia ta pafo di e awa territorial di Aruba y tambe pafo di e area di Search and Rescue (SAR) di Aruba, autoridadnan local a caba cu involucracion directo den e caso di e barco Melenia.

            Gobierno di Aruba ta sigui e situacion di cerca y ta den contacto partnernan Internacional pa mas coordinacion si ta necesario.