Chauffeur di Prome Ministro deteni pa investigacion di caso actonan inmoral

Pa colmo durante razzia a descubri arma tambe

ORANJESTAD (AAN): Autoridadnan hudicial cu ta investiga casonan delicado, riba Diamars a detene un homber relaciona cu un investigacion rond di actonan inmoral y/of delitonan sexual.

   E persona deteni ta S.R.K. di 59 aña biba na Papilon.  Ministerio Publico a duna OK pa tene un razzia tambe na su cas.

   Algo importante cu nan a bin haya eynan ta diferente Hard-Disk Drive Portatil cu informacion necesario pa e investigacion riba dje.  Tur e aparatonan aki di Memoria a wordo confisca.

   Pero pa puro casualidad a bin haya arma di candela tambe.  Vocero Ann Angela di Ministerio Publico a confirma cu a haya seis arma di candela, y un cantidad bastante di municion.  E sospechoso tabata un persona basta activo un tempo den deporte di tiro na tereno di Wela.

   A bira conoci cu den pasado, e sospechoso K. ta un funcionario di Departamento di Inmigracion, y a bay cay ‘ter beschikking’ y a bira driver di Ministro Rudy Croes (dfm), y despues a bay cay ‘ter beschikking’ pa bira driver di Ministro President Evelyn Wever-Croes.

   Ministerio Publico no a duna detaye di e caso, y a bisa cu nan lo no duna mas informacion tampoco na e momento aki, pa garantiza e integridad di e investigacion.