Un aña di prison exigi pa Tiel

Den caso Flamingo

ORANJESTAD (AAN): Diamars mainta den Corte di Husticia a sigui cu tratamento di e caso Flamingo, caminda a sigui cu e caso penal contra Gilberto Tiel cu aña pasa no a presenta durante tratamento di e caso. E ta kedando na Merca, Hues a instrui Ministerio Publico pa cita Tiel pa e ta presente.

   Toch Diamars mainta Tiel no a presenta. Hues a mustra na e dos Fiscalnan cu for documento cu el a haya, a cita Tiel pa Corte pero no a menciona ora. Fiscalnan despues di a check e documentonan, a mustra Hues cu Ministerio Publico a manda citacion pa Tiel y a inform’e debidamente cu e mester tey 8:30’or di mainta.

   Esey ta haci cu Hues a sigui cu tratamento di e caso sin cu Tiel tabata presente.

   Cumpra Otmar y malversa Gobierno: Na luna di November 2024, Ministerio Publico a presenta e acusacion di 3 empleado fantasma o sea nan tabata worde paga pero realmente nan no ta den servicio di Gobierno. Esaki ta worde considera malversacion di placa di Gobierno.

   Ta trata aki di Gilberto Tiel, Laurence Phillips y Hans Geerman, kendenan ta worde acusa di a gana placa di Gobierno sin cu tabata realmente den servicio di Gobierno entre Januari 2018 y Juni 2020.

   Hues a mustra cu Tiel tabata den un caso dia 23 December 2020 y Hues a declara no admisibel cu Tiel tabata den servicio di Gobierno. Segun e sentencia, Tiel tabata un patronahe politico y no tabatin un trabao den Gobierno, ganando mas cu 4 mil Florin. Hues a mustra cu Corte ta haya cu no tabatin un acuerdo di trabao real y a declara Tiel no admisibel.

   Hues a mustra tambe cu Tiel lo tabata traha pa e compania di yiu di Otmar, Jeandrick den su tempo liber. Otmar a bisa cu el a haci asina cu 5 otro trahador, pa nan por haci otro trabao. Jeandrick a bisa Hues cu Tiel tabata traha cu ne den bar pasobra Tiel tin hopi conocemento. El a bisa cu Tiel tabata gana a base di comision.

   Hues a mustra cu a interoga Jeandrick y a scucha combersacionnan y LandsRecherche ta conclui cu Tiel tabata den servicio di Jeandrick. Hues a mustra cu Tiel a worde interoga na Hues Comisario caminda el a bisa cu e tabata traha pa Jeandrick y tabata haya comision.

   Fiscal a exigi 1 aña di prison: Un di e dos Fiscalnan a hiba palabra y a bisa cu Tiel a cumpra Oduber y tabata un ambtenaar fantasma. Fiscal a bisa cu Marisol Tromp a haci denuncia di ambtenaar fantasma. Fiscal ta haya legalmente proba cu Tiel ta un trahador fantasma.

   Fiscal tambe ta haya cu Tiel a malversa Gobierno door di no tabata traha cu Oduber sino e yiu homber di Oduber. Na opinion di Fiscal, Tiel a haya trabao for di Otmar y tabata traha pa Otmar pero a bay traha pa e yiu homber di Oduber. Fiscal ta considera esaki cu Tiel a cumpra Otmar Oduber y malversa Gobierno. Fiscal a exigi 12 luna di prison pa Tiel.