Minister Presidente Evelyn Wever Croes a bishita Scol Cacique Macuarima

Den cuadro di Dia di Betico:

ORANJESTAD (AAN) Minister Presidente Demisionario, Evelyn Wever Croes, a hiba palabra den conferencia di prensa di Gobierno, y a elabora riba “Dia di Betico”, cu lo wordo celebra Diasabra di e siman aki, dia 25 di Januari.

   “E siman aki ta e siman di Dia di Betico y manera ta e tradicion, nos ta haciendo bishitanan na cas pa wak con scolnan ta preparando pa e gran dia aki”, e dignatario a menciona.

   Dialuna, un biaha mas e tabata tin e honor di bishita Scol Cacique Macuarima, Klas 6-A cu Klas 6-B, p’asina papia un poco mas di e lucha di Betico, su bida y su logronan importante. “E metanan di e bishitanan aki ta, pa e muchanan realiza cu Betico, na e edad aki, tabata un mucha comun y coriente, mescos cu nan y cu e tabata tin un amor grandi pa Aruba pero e tabata mescos cu nan. E tabata gusta bay scol, tin biaha si, tin biaha no, e tabata gusta su deporte, tin biaha tabata bay bon na scol, tin biaha no, mescos cu cualkier otro mucha, pero el a logra cosnan grandi pa Aruba”, Minister Wever-Croes a señala.

Prome Minister kier pa e muchanan aki sa, cu cada un tin un tiki di Betico den nan, y cu, cu esey nan por logra cosnan grandi pa nan mes y pa Aruba tambe.

Finalmente, el a gradici Juffrouw Rachelle Croes-Caster y e juffrouwnan di Klas 6-A cu Klas 6-B, pa permiti e bishita aki, y tur e alumnonan. “E tabata un mainta hopi agradable unda nos a comparti mas hopi informacion cu ta posible, p’asina nan sa tambe y por prepara mas pa e dia importante, Dia di Betico”, Minister Presidente demisionario, Evelyn Wever-Croes, a declara.