Economia Arubano tambe den man di poder mundial Trump

Donald Trump ta pone Dollar lora y lidernan mundial na careda 

*Europa preocupa cu expansion industrial y tarifa importacion   

*Prijs di petroleo a baha despues di presentacion  di plan basico 

ORANJESTAD(AAN)—Uno di e puntonan mas importante cu a bini dilanti ora Presidente Donald Trump tabata firma decretonan presidencial, tabata e posicion di Merca enfrente comercio internacional y factornan cu ta directamente mara na e forma con e lo pone Dollar Mericano circula.

Cu palabranan simpel, el a mustra con e kier restora  Merca den su grandeza.

Presidente Donald Trump a mustra riba e forma cu mester expande e economia Mericano pa duna mas sosten na e Dollar Mericano y resolve problemanan di e poblacion di e pais, cu ta bira victima di entre otro entrada ilegal na e pais, contra cual ya el a firma ordennan pa actua.

Pa Aruba ta sumamente interesante pa tuma nota di e forma cu e tin intencion pa atende entre otro cu Venezuela, cu manera el a trece dilanti no por intimida su Gobierno cu entrega di producto di sector petrolero.

“Nos mes tin azeta den nos suela,” tabata su contesta riba e posibilidad cu Venezuela lo por a intimida Merca a base di entrega di productonan petrolero.

E tono aki tambe el a mantene enfrente otro paisnan industrial cu ta entrega productonan na Merca y ta haci ganashi enorme cu nan productonan cu ta produci problemanan economico pa e pais.

Cu Presidente Trump tabata tin razon cu Merca mes por produci loke ta necesario pa su pais y asina percura pa crecemento economico di Merca mes, a bini dilanti den reaccion di entre otro Union Europeo cu ta teme cu e belasting di 25 porciento cu Trump ta impone riba Mexico y Canada,  por bira realidad pa paisnan Europeo tambe.

Esaki lo trece cune cu productonan importa na Merca for di paisnan Europeo lo bira mas costoso pa e poblacion di Merca, cu tin placa pa habri su propio negoshinan na un prijs mas barata y asina competi cu productonan importa.

Te awor ta wordo pensa cu e medida contra Mexico y Canada ta relaciona cu otro problemanan cu ta origina pa Merca na e paisnan bisiña, pero paisnan Europeo mester tene na consideracion cu un parti di nan empresanan tin filial na Mexico y Canada y ta wordo afecta pa e medida.

Informantenan a mustra DIARIO, cu medidanan cu Presidente Trump lo tuma, mester wordo tene na consideracion tambe na Aruba, cu tin Merca como pais cu ta encarga cu un parti grandi di su importacion di productonan pa mercado Arubano.

Na mes momento, semper mester tene na consideracion cu Merca ta e productor mas grandi di turismo pa Aruba y cu economia di Aruba ta depende di Merca.

Un impacto fuerte pa Aruba tambe por ta, e forma cu na momento cu Merca cera porta pa migrantenan ilegal, mas refugiado social lo trata di drenta na entre otro Aruba y otro islanan Hulandes.

Con fuerte e impacto di regreso di Presidente Trump ta pa mundo, ta bira cada rato mas cla, den reaccionnan mundial.

Ayera despues di e prome anuncionan di Presidente Trump, e prijs di petroleo a baha cu resultado cu e lo tin dentro di mas o menos tres luna pa Aruba.

Mester apunta cu e forma cu Presidente Trump ta presenta su maneho, ta uno comprendibel pa tur hende, cu palabranan simpel di un comerciante cu claramente ta uza su formula pa placa lora,  pa yega na solucionnan di su pais tambe.

Sinembargo, mester tene cuenta cu un Merca sumamente tolerante, awor mescos cu hopi otro pais grandi, kier soluciona nan propio problemanan cu a origina tambe den atencion cu a wordo presta na desaroyonan mundial for di Segunda Guera Mundial.

Con serio e resultado di presidencia di Trump ta pa mundo, a bini dilanti ora el a acudi na un Misa, caminda e Obispo a pidi e presidente personalmente, pa tene cuenta cu tin un grupo di hende cu tin miedo cu su gobernacion por afecta nan, manera ta e caso cu immigrantenan ilegal.

DIARIO lo sigui informa Aruba debidamente di e cambionan gubernamental na Merca, di cual Aruba ta dependiente riba hopi tereno.