Prome Minister ta felicita tur docente y alumno St. Dominicus College cu e 110 aniversario

ORANJESTAD (AAN): Recientemente riba 15 di Januari 2025, St. Dominicus College a celebra nan di 110 aniversario.

E scol ta situa den curason di Oranjestad y pa añanan largo a sa di ofrece un bon educacion na nos yiunan.

   Prome Minister Evelyn Wever-Croes a expresa di ta sumamente agradecido na e cabesante di scol Caroline Cardose y su team completo pa e trabao grandi y bunita cu nan a bin ta eherce den ofrece educacion di calidad na nos muchanan. Pasobra ta hopi ta e muchanan cu awe ta adulto, y profesionalnan danki na e enseñansa basico cu e scol aki a ofrece nan.

   "Mi ta felicita tur e docente y alumnonan di Sint Dominicus College cu nan di 110 aniversario. Mi ta spera cu e celebracion aki por inpsira cada un di nan pa sigui duna lo miho di nan mes y pa sigui educa nos yiunan pa asina nan por crea un bon base pa futuro.

   Tambe mi ta gradici e docentenan pa a scoge e ramo di enseñansa como nan trabao pasobra e ta sigur un di e funcionnan mas importante den desaroyo di nos muchanan. Danki na cada un di boso pa e esfuerso y dedicacion na nos yiunan, y pa e impacto positivo cu boso tin riba nan crecemento. Boso trabao ta uno valioso, cu sigur nos como mayor y gobernante ta aprecia", Prome Minister a expresa.