Cambio di nomber Caiso & Soca Monarch nunca a trece exigencianan nobo pa e cancionnan

Presidente di MUSICA ta confirma:

ORANJESTAD(AAN): Mirando e discusion cu tin pa algun aña caba riba e cambio di nomber di Calypso and Roadmarch pa Caiso and Soca Monarch, incluyendo e aña aki, DIARIO a dicidi di entrevista presidente di Stichting MUSICA Edwina Werleman riba e topico.

   Aunque ya caba mester ta conoci cu e cambio di nomber no a afecta e ‘contest’ na ningun manera, varios hende den comunidad incluyendo locutornan ta pensa cu si.

   “E nomber mester cambia bek pa nos haya nos cancionnan bek di antes” y “Stichting MUSICA cu e cambio di nomber kier hiba e contest den un otro direccion” (mas Soca), ta algun di e comentarionan eroneo cu bo por lesa tur caminda riba social media y scucha riba radio.

Combersando cu Werleman el a confirma locual DIARIO tabata asumi tambe, cu e cambio di nomber tabata djis pa e otro islanan rond cu tin e mesun tipo di competencia aki pa Carnaval, reconoce ta cua competencia e ta.

Esey ta e unico meta di e cambio, segun e presidente di MUSICA.

Tin hende cu di berdad ta pensa cu debi na e cambio di nomber, esnan na cabez di e contest ta exigi cierto cosnan for di e musiconan cu ta traha nan cancionnan y esey no ta berdad.

Varios hende ta pensa cu por ehempel e hurado di e contest riba papel mester huzga si e cancion ta mas of ta menos Soca, pa asina duna nan mas punto.

Esaki tambe ta completamente fout.

E hurado ta huzga solamente locual semper ta wordo huzga, manera por ehempel e presentacion di e cantante.

Werleman a enfatiza cu tur cantante por bin cu cualkier tipo di Roadmarch y esun cu e hurado haya mihor ta gana.

Pues si e nomber cambia bek of no cambia, no ta bay tin ningun cambio den ki tipo di cancion gana of perde.