Turtuga blanco ta protegi pa leynan local y tratadonan internacional

Directie Natuur en Milieu (DNM): Haya sa mas tocante e turtuga blanco

ORANJESTAD (AAN):  E turtuga blanco (Chelonia mydas), na Ingles nan ta yam’e ‘Green turtle’. E ta un especie di turtuga di lama di e famia Cheloniidae. E ta haya su nomber na Papiamento como turtuga blanco pasobra su cuero bou di su curpa ta mayoria biaha color blanco.

             E color di su casca ta cambia cu tempo. Ora nan ta chikito e casca ta preto y ta keda den tono scur. Mientras esunnan di e adulto por bira completamente bruin, of cu patronchi y strepinan, manera marmerisa, den tono bruin.

            E turtuga blanco su snuit ta cortico compara cu otro turtuganan di lama. E turtuga di lama aki no por hinca su cabes den e casca pavia di su casca poco plat y den un forma aerodinamico p’e por landra mas lihe. Asina tambe e por scapa di peliger.

            E turtuga blanco adulto ta crece te 1.5 meter largo y ta pisa entre 68 pa 190 kg. E turtuga blanco ora e ta adulto e ta bira herbivoro. E ta come blachi manera yerba di lama. Pero ora nan ta chikito y hubenil nan ta come: pisca chikito of  e webonan,‘yelly-fish’ y invertebranan.

            E adultonan ta biba den awa poco hundo (area di costa) y ta busca alimentacion mordiendo e puntanan di blachinan di e yerba di lama, asina nan ta yuda mantene e yerbanan. Mescos cu e otro turtuganan di lama, e turtuga blanco ta migra distancia largo pa e por pone su webonan riba e beach den buraconan cu e mes ta coba. E embranan ta esunan cu ta subi tera den anochi pa pone webonan. Despues di mas of menos 60 dia e webonan ta broei y e yiunan ta sali y busca rumbo pa lama. Nan ta encontra hopi dificultad den e trayectoria pa bira adulto. Esunnan cu yega na bira adulto por biba te cu 90 aña.

            E turtuga blanco ta protegi pa leynan local y tratadonan internacional manera CITES y SPAW. Pues ta ilegal pa colecta, daña, stroba of mata nan of nan webonan. Sinembargo, e turtuganan di lama ta den peliger ainda pa motibo di actividad humano manera consumo, contaminacion, desaroyo y recreacion.