Minister Xiomara Maduro tambe a dispidi di ex Premier Henny Eman:

ORANJESTAD (AAN):  Dialuna mainta a tuma luga e despedida di ex Minister President Sr. Henny Eman dilanti Bestuurskantoor.

E corteho funebre a wordo ricibi pa Conseho di Minister hunto cu e personal di Bestuurskantoor pa asina duna un ultimo honor, rindi respet y despedi di Sr. Eman cu tabata e Prome Minister President di Aruba.

            Minister Xiomara Maduro como Vice Minister President di Aruba a hiba palabra pa duna condolencia y desea famia, amistadnan, y partido AVP hopi forza cu e perdida di nan ser keri.

            Den su discurso e mandatario a expresa, “Aki na e edificio di Bestuurskantoor, Sr. Eman a sirbi pueblo di Aruba varios biaha como Prome Minister di Pais Aruba. Awe nos ta brinda un ultimo respet y na honor di Henny Eman su trabou y esfuerso na bienestar di Aruba, den nomber di Gobierno Aruba, nos ta tuma un minuut di silencio”.