Un Pueblo cu a haci sacrificio grandi awor en espera di un Gobierno
- Cambio den Parlamento y Gobierno ta exigi pa supera loke ta bay cas
- E caha di placa di Pueblo awor mester percura pa mas pan riba mesa
ORANJESTAD (AAN) Finalmente e eleccion di Parlamento, cu a wordo adelanta na un forma historico sin motibo real, ta drenta e etapa cu den seno di Parlamento ta wordo dicidi ta kende lo bay goberna Aruba.
Den practica politica a duna prueba, cu tin diferente forma cu politiconan por mira e proceso democratico hancra den e proceso electoral.
Na prome lugar politica ta e industria, cu ta mas capaz pa produci hefenan, cu ta acepta un responsabilidad sin cu realmente nan a duna e Pueblo cu ta paga pa nan trabou, e prueba cu nan ta capaz pa hacie.
Politica ta e unico negoshi cu ta genera entrada pa su participantenan, cu no exigi ningun prueba cu e persona envolvi no solamente ta pensa cu e ta capaz pa haci e trabou, pero ta considera e trabou como politico cu e herment mas facil pa e yega caminda e kier yega den bida.
Poco doño di negoshi, ta ricibi e placa cu politico ta ricibi, pa nan trabou den nan propio negoshi den cual nan mester inverti.
Personanan cu capacidad enorme den trabou peligroso di soldat den ehercito te e experto cu mester drecha un dak of waya di coriente den yobida, no ta ni soña cu e placa cu un politico ta ricibi pa representa Pueblo, cu for di 2017 mester a paga pa e desaster cu a wordo crea cu placa di Pueblo.
Awe, un Aruba recupera, cu tin placa den caha cu politiconan lo maneha, ta spera cumplimento di promesa di campaña di cual e mihor promesa cu tabata 700 Florin mas na pensioen di behez, ya a parce di a hoga na poz.
Cu sudor di su frente Pueblo a percura na man di e expertonan saliente di Gobierno Wever-Croes cu a haya aplauso mundial pa nan trabou, pa tin placa den caha di Gobierno.
Ta poco tristo pa Pueblo scucha cu no ta con ta bay gasta e placa ta bini na prome lugar, pero kende lo sinta den stul di Ministro y tur loke Ministro por pone sinta den stul.
Hunto cu Pueblo DIARIO ta en espera pa mira kico lo pasa cu e coseha di oro cu e Gobierno nobo lo hereda aunke te awe Pueblo no por comprende pakico tanto urgencia pa e Gobierno bieu bay cas prome cu su tempo!
