Tin 18 banda pa prefinalnan di Aruba Soca Monarch 2025

Diamars ta cuminza prefinalnan di Soca Monarch

ORANJESTAD (AAN): Diamars awor tur cos ta cuminza!  E asina yama ‘Prefinals’ di Aruba Soca Monarch 2025 ta Diamars 14, Diaranson 15, y Diahuebs 16 di Januari 2025 na Centro di Bario Brazil.

   Stichting Musica ta sumamente satisfecho cu e cantidad di banda y artista cu a inscribi y ta anticipa cu un variacion grandi di produccion den genero di Soca lo worde presenta. E Prefinals lo conta cu participacion di ambos veterano y “rookies”. E organizacion ta gradici e bandanan cu tey tur aña pa sostene y participa na e festival. Tambe, ta yama bonbini na artistanan nobo y esnan cu tin algun tempo sin participa na e festival.

   Cada banda y artista tin nan mesun zjeito y sonido, y netamente esaki ta loke ta haci e festival aki na Aruba asina dushi; na final di dia lo tin un ritmo y estilo di Soca pa cada ken su gusto, sea si esaki ta trece nostalgia cu un carisma di e “Roadmarch” di algun decada atras of ta energetico y cu un sonido cu inspiracion internacional. Den palabra di e presidente di Stichting Musica, señora Edwina Werleman: “May the best one win!”

   Durante un anochi masha placentero na hotel TRYP by Wyndham, e Band Leaders y artistanan presente a disfruta di un Soca Tryp cocktail y a trek lot, cu e siguiente resultado:

—Prefinal Dia 1:

Diamars 14 Januari:

#1 The Gang.  #2: Shine Music. #3 DLS. #4 Suona. #5 Oreo. #6 Impak 4Play.

—Prefinal Dia 2:

Diaranson 15 Jan:

#1 Phenomenon. #2 Good Times.  #3 Buleria.  #4 Azucar. #5 ‘N Fuzion. #6 Duro.

—Prefinal Dia 3:

Diahuebs 16 Jan:

#1 YX3M. #2 Hot Ones Band. #3 Groove Masters. #4 D’Islanderz. #5 Tsunami. #6 Zeta Band.

   DIARIO a compronde cu entrada pa e prefinalnan ta diescinco Florin cada anochi.  Carchi pa anochi final ta trinticinco Florin.  Tin package pa tur anochi tambe.