*Democracia ta haci posibel pa Pueblo mes vota pa destructor

Awe Venezuela ta presenta e otro cara di eleccion democratico 

E realidad di eror electoral y di lobo scondi!

ORANJESTAD(AAN) — Awe Pueblo di Venezuela ta bay urna electoral pa supuestamente eligi un dirigente nobo pa e pais.

E proceso electoral cu a wordo introduci pa Pueblo por dicidi kende lo goberna su pais y asina goberna bida di tur ciudadano di e pais, ta e arma mas grandi di dictadornan, abusadornan di e proceso electoral cu ta haci posibel pa e ciudadano dicidi kende ta goberna e pais.

Realidad di bida ta, cu e cantidad di persona cu realmente conoce e persona pa cual nan ta vota ta sumamente chikito, mas ainda si hende ta biba na un pais grandi cu Miyones di habitante.

Historia humano ta describi e realidad, cu politica ta e forma mas facil pa un lobo bisti trahe di carne.

Historia di Venezuela realmente ta uno sumamente tristo. Ta trata aki di uno di e paisnan cu naturaleza a entrega e rikeza hasta mas grandi na mundo ora papia di e cantidad di petroleo cu tin den suelo Venezolano.

Naturaleza a entrega Venezuela camponan enorme pa cultiva cuminda, laman y rionan pa pesca y ceronan halto ora kier hasta deshaci di solo pa disfruta di clima friu.

Suelo di Venezuela ta produci rikeza pero cada dia cu pasa, pobreza ta sigui haci avance na e pais, cu a cay den trampa di dictadura.

Hende a perde tur balor na Venezuela cu awe den bofon di democracia, ta bay urna electoral pa depone voto cu mester percura pa Nicolas Maduro keda na poder. Hasta un voto contra Nicolas Maduro, ta bira un voto pa Nicolas Maduro.

Opositornan di Nicolas Maduro manera Maria Machado a wordo detene ayera pa asina evita cu nan sikiera habri nan boca y expresa cu nan ta contra dictadura.

Un dia Simon Bolivar a subi su cabay pa entrega historia, un pais nobo caminda dominio Spaño a yega na su fin.

Awe Simon Bolivar ta wordo uza pa dictador Nicolas Maduro, kende, cu sosten di Rusia Comunista, destrui e libertad, e bida, e bienestar di e Venezolano, pa e por goza di loke e mes no por produci!

E lobo scondi ta e otro cara di democracia!