Cambionan di impuesto ta nifica cu 12 mil hogar no ta bay paga mas inkomsten y loonbelasting

Minister Xiomara Maduro a anuncia:

*10% ta bira 0% 

ORANJESTAD (AAN): Diamars atardi a tuma lugar un conferencia di prensa na Bestuurskantoor, unda cu Minister  saliente di Finanzas y Cultura Xiomara Maduro a tene un rueda di prensa, pa splica di e bahada di inkomstenbelasting y loonbelasting.

            Maduro a cuminza na bisa cu un tarifa ta cambia, esta cu e 10% ta bira 0%. “E belastingvrije voet pa keda 30 mil, pero e tarifa ta cambia y e cambio aki ta trece beneficio pa tur esnan cu ta paga belasting”.

Pues tur esnan cu ta paga inkomstenbelasting y loonbelasting, ta bay mira un rebaho den esaki, segun e mandatario.

            El a indica cu a haci un analisis cu den luna di Augustus a cuminsa, cu ta mustra cu den e esfera di e belastingnan directo, loonbelasting, por bin un alivio pa comunidad.

            “Ta asina cu cada biaha cu nos a trece cambionan fiscal, nos a trece tambe compensacion pa esnan mas vulnerable den comunidad”.

            Nos a tene cuenta tambe cu locual cu ta e perdida di poder di compra y pesey na 2023 nos a introduci tambe un rebaho di e tarifa di invoerrechten, pero esaki lamentablemente no a traduci den prijsnan mas abao.

            Pesey e ora ey nos a bay bek den locual ta e esfera di belasting directo, inkomestenbelasting y loonbelasting y nos a haci un analisis cu a demostra cu nos por elimina e prome parti di e tarifa cu ta 10%, segun e minister.

El a sigui bisa cu hogarnan na Aruba awor ta bay tin un alivio grandi. E cambio ta trece un alivio pa 21 mil hogar na Aruba cu ta paga impuesto.

            Segun e minister, di e 21 mil hogarnan, 12 mil hogar (16.000 pagador di belasting), no mester loon of inkomstenbelasting mas.

            El a splica cu 9 mil hogar, esta 12 mil persona, lo sigui paga e belastingnan aki, pero pa nan tambe tin un reduccion cu ta nifica cu nan ta bay dilanti cada aña cu 3.493 florin.

            Durante e conferencia di prensa director di Servicio di Impuesto Luenne Gomez-Pieters a  duna un splicacion mas detaye cu cifra, riba e cambionan.

            El a splica cu for di 2018 caba Servicio di Impuesto y mister di Finanzas a cuminza cu un plan pa haci cambionan necesario di impuestonan directo pa impuestonan indirecto.

            “Esaki ta un cambio cu nos ta mira mundialmente ta sosode, caminda cu tin un movecion di impuestonan directo pa impuestonan indirecto”, segun Gomez-Pieters.

            El a indica cu riba e website di Servicio di Impuesto tur hende por yena nan salario y check kico e cambionan introduci lo nifica pa nan.