Lider di MEP Evelyn Wever-Croes tabatin su prome reunion cu Informador

A yega na e conclusion cu 86.67% di e programanan di MEP y FUTURO ta alinea cu otro

*MEP ta dispuesto pa forma Gobierno 

ORANJESTAD (AAN):  Diamars mainta na cas di Gobernador, Lider di MEP, Evelyn Wever-Croes, hunto cu Presidente di Partido MEP, Ricky Hoek, tabatin e prome reunion cu Informador, señora Tisa LaSorte. A presenta Programa di Partido MEP y tambe a ricibi varios pregunta relevante pa desaroyo di Aruba y formacion di e proximo gobernacion.

            Señora Tisa LaSorte ta e persona cu a keda apunta pa SE Gobernador Alfonso Boekhoudt como Informador y ta reuniendo cu partidonan cu a obtene asiento den e eleccion di dia 6 di December ultimo.

            Den e reunion, a combersa riba e programa di Partido MEP na unda cu Lider di MEP a presenta e puntonan fuerte cu Partido MEP ta para p’e. Señora Tisa LaSorte a haci varios pregunta di vision di Partido MEP riba desaroyonan importante pa Aruba, social, economico, financiero, relacion cu Hulanda, tema di Venezuela entre otro.

            Tambe, e pregunta crucial tabata si MEP ta dispuesto pa forma un gobierno. Lider di MEP su contesta tabata cu MEP ta dispuesto haci esaki mientras Partido MEP no ta exclui pero ta warda e desaroyonan di formacion mirando cu Partido MEP no ta e prome yama pa forma gobierno.

            Mientras tanto, Partido MEP a haci un comparacion entre programanan di Partido MEP y Partido FUTURO. A yega na e conclusion cu 86.67% di e dos programanan ta alinea cu otro y e diferencianan cu tin no ta diferencianan cu no por surpasa.

            “Esaki ta trabounan cu nos a haci adelanta pa prepara pa e reunion cu e informado y nos ta keda pendiente pa e siguiente reunionnan. E intencion di señora LaSorte ta pa keda cla prome cu diabierna benidero y si tin mester e lo yama e partidonan atrobe”, Lider di MEP a duna di conoce.