AVP y Futuro bay forma e Gobierno cu boso a pone den wea!

Esaki ta e idioma cu e coalicion fracasa di oposicion y RAIZ merece

*Tiro a sali pa culata y awor bin proba cu boso por mihor cu Evelyn

*Historia di Betico Croes y AVP ta ripiti cu Cecilia como lider di AVP? 

ORANJESTAD (AAN) — Durante 2024, Aruba no a haya chens pa relaha un rato pasobra wea a bay candela pa asina prepara e plato politico suculento pa e loke a bira “coalicion den oposicion” den Parlamento por a logra caida di Gobierno Evelyn Wever-Croes.

Un traicion politico total a wordo fabrica dor di e partido Raiz, cu riba su mes no por a goberna pero como partido chikito na man di MEP, a kere cu e por manda na Aruba y na mundo cu su dos asientonan den Parlamento.

Loke a pasa den mundo politico di Aruba na 2024, ta un berguensa pa partidonan opositor di e Gobierno di Evelyn Wever-Croes, cu a logra loke ni sikiera e Gobierno di Reino no por a logra, cu ta saca e pais for di e desaster total cu Mike Eman a crea den su Penthouse, caminda e miseria den cual el a pusha Aruba den pasado, tabata spera riba ripiticion.

DIARIO na tanto ocasion a adverti cu loke a pasa cu Betico Croes cuarenta aña pasa, por bolbe ripiti sabiendo di fuentenan bon na haltura kico tabata pasa den e trampa cu a wordo forma den e supuesto coalicion cu a haci posibel pa Raiz por tabata parti di gobernacion.

Mester papia di traicion ora papia di e motibo cu a conduci directamente na eleccion na Aruba ora Raiz cu dos asiento, a kibra e acuerdo di gobernacion cu MEP, sabiendo cu asina e ta baha Gobierno di Evelyn Wever-Croes.

Na 2024 Aruba a conoce e momento, cu Raiz como partido di coalicion, a bira parti di oposicion cu tabata tin un proposito, cu tabata manda Gobierno Evelyn Wever-Croes cas y pa logra esaki a trata na kibra e imagen di Evelyn Wever-Croes pero den esaki a faya.

Mike Eman, cu ora el a perde eleccion a 2017 pasobra el a zink Aruba y a bolbe ora el a kere cu Pandemia lo a dune oportunidad pa cobra salario di Ministro Presidente, a mira su oportunidad.

Den un acto historico, den Parlamento di Aruba a crea un union cu a uza voto di Benny Sevinger cu a wordo condena na castigo di prison, pa baha Gobierno Wever-Croes cu a introduci e Ley di Integridad despues di e desastre di scandal cu AVP a laga atras.

E union di partidonan cu a uni na 2024 pa a base di traicion di Raiz por a baha Gobierno Evelyn Wever-Croes, no a logra “bolter”e asunto manera nan a kere.

Awor e momento a yega pa Evelyn Wever-Croes “bolter”e episodio politico mas tristo cu Aruba a conoce, y habri porta pa AVP y Futuro reuni den gobierno a base di e union cu nan a forma den Parlamento, caminda hasta Benny Sevinger a wordo pordona di tur pica, aunke e hecho cu el a hiba su caso cassatie, a haci cu e ta homber liber ainda.

Lamentablemente Raiz mester bay cas pa otro goza di e logro di su traicion cu a bira caida di su Gobierno.

E prome opcion cu mayoria di personanan cu a sostene Evelyn Wever-Croes ta mira ta, pa MEP bay oposicion y laga Gobierno na man di Mike Eman, cu awor mester splica Pueblo di Aruba e realidad di Cecilia, cu Mike a uza pa “bolter cos” pero cu e Arubiano cu conoce historia di Aruba, no ta acepta sin mas pasobra nan sa con den AVP a “bolter cos” pa uza Betico Croes pa haya voto pero a nenga Betico Croes pa bira lider di AVP pasobra e no tabata Eman.

Esaki a conduci na fundacion di MEP, manera ta conoci pa Arubianonan cu ta puntra nan mes kico suerte di Cecilia lo ta awor cu el a scapa Mike di un derota electoral cu e cantidad di voto cu el a haya na momento cu manera ya tabata conoci, Mike a bira partido chikito.

Si mira pasado di AVP, e pregunta grandi ta, kico ta futuro di Cecilia?

Nos ta laga e contesta na tempo, cu ta e mihor maestro.

E momento a yega pa AVP y Futuro uni y forma Gobierno. Nan tin experencia cu otro y porfin por forma oficialmente e coalicion cu tabata oposicion den Parlamento di Aruba, e instituto sagrado di democracia y di Pueblo di Aruba, cu a perde honor y gloria den e temporada cu e mes Benny Sevinger cu hasta a percura pa kiebra den AVP ora el a wordo castiga na prison, a yuda manda Gobierno Evelyn Wever-Croes cas sin splica kico lo pasa awor cu e programa di Integridad politico, cu Evelyn Wever-Croes ta laga atras como herencia!