Speedboat cu 350 kilo di droga intercepta pariba di Aruba

ORANJESTAD (AAN): E biaha aki si e intento di bolbe uza costa nort di Aruba pa drop droga, a fracasa! 

Radar tabata funciona y persona atento a ripara algo raro.  Tabata siman pasa Diahuebs den oranan di anochi, cu Wardacosta di Caribe Hulandes a detecta un boto ta nabegando for di zuid rumbo pa Aruba.  Mesora a pone Centro MOC na altura, cu a hisa un avion Dash-8 pa bay observa e boto aki di basta halto, sin cu nan ta ripara mes.

   Fuera di esey, a pone un team di oficial abordo di un boto rapido tipo Metal Shark sali for di Pier na Savaneta, y a mobilisa pariba di Aruba pa analisa e situacion.

   Yegando mas cerca, e tripulantenan di e boto misterioso a ripara cu autoridad a descubri nan, y mesora nan a cuminza zwaai y benta diferente bulto riba lama.  Despues di un rato a logra stop e boto, y tur cuatro persona abordo a hisa nan mannan den halto.

   Oficialnan di Wardacosta a bay abordo, pa asina detene e cuatro persona, y nan a lastra e boto, y tambe piki tur e bultonan bek, pa hiba nan pa e Pier di Savaneta cu Wardacosta ta usa.

   Tur cuatro homber ta di nacionalidad Venezolano, y nan a ser entrega na personal di Seccion Crimen Organiza di UGC di Cuerpo Policial.  E bultonan tabata contene 350 kilo di droga, y a wordo destrui mesora.