Venezuela a firma acuerdo cu inversionistanan Hulandes pa un compleho turistico na Paraguana

ORANJESTAD (AAN): Venezuela a fortalece den su oferta riba tereno di Turismo, cu un recien firmamento di un MoU,

cu ta encera un acuerdo di cooperacion cu inversionistanan importante di Hulanda, cu ta bay funciona a base di cooperacion mutuo, intercambio di experiencia, y formamento profesional y ehecuta e proyectonan cu ta bay yuda impulsa crecemento economico pa e pais.

   E informacion a wordo duna door di Ministro di Poder Popular pa Turismo, esta Leticia Gómez, via di social media, unda el a mustra cu e proyecto lo bay wordo traha den e Zona Economico Special di peninsula di Paraguana na estado Falcon, cu desaroyo cu ta bay tuma diferente fase di un compleho di Beach na pueblo di Adicora, pa converti esaki den un atraccion turistico cu ta importante pa nivel nacional y internacional.

   E beachnan di Adicora (na Paraguana) ta situa como 52 km zuid for di Baby Beach (Aruba).

   Durante e acto di firmamento di e MoU, tabata presente tambe e Ministro di Poder Popular pa Industria y Produccion Nacional, Alex Saab, y tambe empresarionan di Hulanda cu tabata presente.

   E Zona Economico Special cu tin na peninsula di Paraguana, tin como meta pa sirbi como exportacion, of impulsa e produccion cu e seyo ‘Hecho en Venezuela’, pero tambe promove e inversion y desaroyo economico den sectornan strategico na Venezuela.

   Si acaso e proyecto logra lanta for di tera y cuminza move, e ora nan lo tin di bay haci algun adaptacion na e unico aeropuerto den e region cu ta esun di Aeropuerto Internacional Josefa Camejo di Las Piedras, cu tin un pista di 2.8 kilometer y cu por acepta avion wide-body.  Pero tin di adapta e Terminal pa ricibi y procesa un multitud grandi di pasahero si acaso nan kier acepta vuelonan transatlantico for di Hulanda pa eynan.

   Ademas tin di bay drecha e infrastructura di coriente y awa, como cu ta hopi biaha pa aña e pueblo di Adicora ta keda den scuridad, y tin biaha no tin awa tampoco.

   Fuera di esey, den pasado ta hopi proyecto grandi hotelero a wordo construi na Peninsula di Paraguana a lo largo di costa di Lama Caribe.  Pero tur e proyectonan aki a fracasa, y awendia a keda atras como ruina.