Departamento Asuntonan Economico ta sigui controla bendemento di webo na Aruba

Pa evita cu tin konkelmento

• Webo importa di Colombia aworaki ta esnan cu prijs mas abao 

ORANJESTAD (AAN): No ta djis comunidad, sino hasta Departamento di Asuntonan Economico di Gobierno a bin ta notando cu tin scarcedad di webo e lunanan aki na Aruba.

   Directora di Departamento Economico, Maria Dijkhoff Pita, a splica cu tin aworaki poco escasez di webo di produccion local.  Manera ta conoci, produccion local no ta suficiente pa abastece e consumo cu tin na Aruba pa webo, y debi na esey e Departamento ta duna permiso pa importacion di webo.

   Webo ta unico producto na Aruba cu ta ‘proteha’, pues bo no por importa webo sin permiso di Ministerio di Asuntonan Economico.

   Aworaki debi na diferente motibo, ultimo luna e produccion local a conoce un reduccion.  Pesey a duna tambe mas permiso pa esnan cu ta importando webo.

   Webonan local ta esnan cu casca maron, y esnan importa ta duna permiso unicamente na webo blanco.  Esaki ta ser haci, pa asina e consumidor por mira e diferencia, y tambe debi cu tin diferencia den prijs.

   E motibo cu mag importa webo blanco so, ta cu segun señora Dijkhoff Pita a corda, con tabatin un temporada ora cu webo importa tabata wordo bendi na como 3 te 4 florin pa caha.  Webo local tabata mas caro.  Pero a bin descubri cu antes ora ta importa webo maron tambe, tabata hinca nan den caha di webo local y bende nan mas caro, cu ganashi inhusto.

    Aworaki prijs di webo importa cu ta bin for di Merca, ta mas costoso cu webo local, pues e problema ey no tey mas.  Sinembargo toch Dept di Asuntonan Economico ta keda mantene e regla cu por importa webo blanco so.

   Na Aruba no ta djis importa webo so for di Merca, pero tambe for di Hulanda.  Tambe ultimo tempo a cuminza importa webo for di Colombia tambe.  Nan tur ta webo blanco.

   Control den Supermarket: Debi cu a ricibi hopi reclamo riba prijs di webo, e inspectornan di Departamento di Asuntonan Ecomico ultimo tempo ta haciendo varios control den Supermarkets.  A bin descubri cu prijs di webo importa di Colombia ta na un prijs mas abao, di entre 4 pa 5 Florin pa caha.  Pero e mesun webonan blanco aki ta wordo bendi den mesun caha di webo di Aruba, y ta wordo bendi na prijs mas halto.

   Pesey awor e trabao ta mas intensivo na Departamento di Asuntonan Economico, debi cu tur factura di webo cu wordo importa semanalmente, ta wordo analisa y calcula e prijs pa Por Mayor (groothandel), y prijs Por Detal (kleinhandel), con e prijs di webo di Colombia ta.

   Segun Dijkhoff Pita, pa webonan importa na Aruba, e margen di ganashi ta 50 cen pa docena pa groothandel, y pa kleinhandel e ta 60 cen pa docena.

   Cu e informacion aki, ta haci control door di bay na e Supermarket, pidi factura pa comproba cu enberdad e ganashi ta di 60 cen, y a base di esey por deduci si e tienda ta subiendo prijs demasiado halto.  Siendo cu webo di Colombia na prijs mas abao, ta algo mas positivo pa consumidor.