Falta apenas 5 dia pa e bunita tradicion di Misa di Aurora cuminza na Aruba

ORANJESTAD (AAN) – Dialuna otro siman, ta cuminza un tradicion masha bunita den cual, kizas, un mayoria di e pueblo catolico ta asisti,

y ta lanta bon trempan pa cumpli cu ne. Tin feligres cu ta hacie como un promesa pa un fabor ricibi di nos Señor.

            Ta trata aki di e nuebe Santo Sacrificionan di Misa pa rememora e historia di Jesus, Su nacemento glorioso na Belen y tur loke esaki ta encera. Generalmente, tur Misa ta yena tur e dianan di Misa di Aurora, y como e ta tuma lugar mainta trempan, hopi famia cu ta bay hunto, despues di Misa ta bay desayuna na un cafeteria, ya cu tin varios cu ta habri trempan y ta prepara pa e clientenan cu sigur, lo yega eynan y esaki ta un experiencia masha bunita mes. Tin un par di parokia cu despues di e Misa, ta ofrece e feligresnan coffee, te of juice cu algo pa come manera pan boyo, y e promenan cu ta bay para den rij, ta e muchanan.

            Den diferente pais Latinoamericano tin e custumber di bay Misa di Aurora pero solamente riba dia 25 di December y 1 di Januari. Y esaki ta pa 12 or mey anochi. Pues e celebracion di nuebe Misa di Aurora, muy posiblemente ta Aruba, Curacao y Bonaire so tin e.

            Na Aruba semper tin un Misa cu ta wordo transmiti pa un canal di television of via radioemisora. Ta di spera cu e aña aki tambe, ya cu tin hende cu pa motibo di salud, of pa problema cu transportacion no por bay.