Democracia ta muri ora exponentenan politico bira dudoso

Ley di Integridad mester ta e base pa cualifica bon gobernacion

*Tanto e votador como e candidato mester representa moral limpi

*Hasta forza social y economico di un pais ta sufri den incertidumbre 

ORANJESTAD (AAN) — Pueblo di Aruba a conoce adelanto social durante e ultimo añanan, na medida cu e fuentenan financiero di e pais a bira mas solido.

Asina bienestar por alcansa Pueblo.

DIARIO a dedica hopi tempo na e aspectonan economico, financiero y social, cu generalmente cerca publico ta e base pa dicidi riba bon gobernacion.

Sinembargo, manera ya nos a mustra na otro ocasion, e base mas fuerte di democracia, ta e caracter moral y di honestidad cu cual ta dirigi un Pueblo mescos cu e forma cu mundo politico y votadornan ta tene nan mes na Ley.

Esaki ta haci cu e Ley di Integridad cu a wordo introduci dor di Gobierno Wever-Croes, ta keda e palanca, e parti mas importante, di gobernacion di e pais, pasobra e ta exigi pa e Pueblo cu ta carga e peso financiero di gobernacion, wordo directamente sirbi cu adelanto economico y financiero di e pais, den tur necesidad cu un hende por conoce.

E sistema di belasting di Aruba, ta directamente mara na e forma cu ta maneha Aruba no solamente cu e cantidad di placa cu ta cobra, pero e uzo cu placa di Pueblo mester haya y e deber pa Pueblo den su totalidad progresa.

Den esaki pues, abuso di puesto, di placa of pertenencianan di Pueblo, mester wordo considera crimen mayor.

E placa cu ta drenta caha di Gobierno, ta di Pueblo, y no por ta destina pa ningun hende por bira rico cu e placa cu Pueblo mester paga pa Gobierno sirbi Pueblo.

Uzo democratico di e placa di Pueblo y entrada na facilidadnan di e pais, ta encera tambe, cu Pueblo ta duna gobernantenan cu mester ta capaz pa haci nan trabou na forma eficiente y honesto, un suma cu ta wordo regla pa Ley.

Un gobernante no por bira negoshi den negoshi. Un gobernante no por uza su trabou como Ministro of Miembro di Parlamento, pa placa drenta su cartera personal of pa e por probecha na forma personal di loke ta di Pueblo.

Un gobernante cu ta uza su posicion hasta sin placa pero pa haya fabor of beneficio personal di cualkier indole, ta comete un acto criminal contra democracia, contra e reglanan di gobernacion di un pais y contra e Pueblo directamente.

E imagen di un Gobernante y un Miembro di Parlamento mester ta intachabel y no por laga ningun pregunta atras cerca e ciudadano, cu ta paga belasting pa ricibi e servicionan y asistencia cu su pais pa ley mester entrega su persona.

Democracia ta muri ora exponentenan dudoso haya y tin poder pa uza placa di Pueblo directamente of uza loke ta di Pueblo pa nan ricibi placa den actonan mafioso di personanan of instancianan cu nan ta favorece.

Pa horta un Pueblo un gobernante, un persona cu na un departamento di gobierno ta dicidi pa placa of servicio di loke ta di Pueblo, no solamente por saca placa di un fondo y hinca den su propio fondo of di su amigonan.

Un ladron di Pueblo por haya placa na forma secreto di personanan, cu e ta beneficia cu servicio of propiedad di Pueblo.

E introduccion di Ley di Integridad na Aruba, ta uno di e logronan mas importante di Gobierno Evelyn Wever-Croes, pasobra el a cera porta pa abuso di placa di Pueblo dor di loke por considera sistemanan di Maffia y ladron scondi den e sistemanan cu ta atende cu placa di Pueblo.

Integridad mester keda palanca di democracia, di husticia na Pueblo, cu no por wordo perhudica pa ladronicia di su placa di belasting na forma directo of indirecto.

Integridad di e pais ta dicidi pa e cara di e pais den exterior. E ta dicidi pa e personanan limpi cu un pais por atrae como inversionista of pa atraccion di placa sushi pa medio di placa sushi bou mesa.

E inversionista limpi lo distancia su mes di Aruba si e haya e impresion cu practicanan contra norma di decencia, ta posibel na e pais.

Esey ta haci cu tanto e votador como e politico mester tin concenshi y man limpi pa evita cu e forza social y economico di e pais bira victima di criminalidad!