Forum SNBA y Debate KvK a manda un mensahe cla pa Aruba

Parlamentario Hendrik Tevreden (MEP):

ORANJESTAD (AAN):  Lider di Fraccion di MEP, Hendrik Tevreden, a declara cu durante e Forum di San Nicolas Business Association (SNBA) y Debate di Camara di Comercio (KvK) recien a keda demostra cu seriedad y capacidad den gobernacion ta un "BIG MUST" pa por enfrenta e retonan di Aruba den e proceso di recuperacion.

            E debate a manda un mensahe cla y raspa riba varios aspecto crucial:

- Capacidad y seriedad den gobernacion no ta un opcion, ta un obligacion. - Politica “nobo” no ta cla pa e retonan cu Aruba tin su dilanti. - No tin espacio pa un gobierno aventurero. - Aruba ta den un proceso di recuperacion cu sigur mester uza sano huicio pa maneha finansas publico.

​            Hendrik Tevreden ta remarca cu pa e cuater puntonan principal aki, y hopi mas ta importante lo siguiente:

1. Un liderazgo solido y serio ta necesario pa maneha e pais. 2. Duna continuacion na e proceso di recuperacion financiero y otro aspectonan crucial pa nos pais. 3. Laga hende capacita y serio sigui atende cu Hulanda riba tur loke ta concerni interesnan di Aruba. 4. Aruba mester di un politica madura, leu di politica populista of aventurero y sin contenido.

​            Tevreden ta enfatisa cu na e momento aki ta crucial den historia di Aruba realisa cu solamente un partido tin y sin duda esey ta MEP bou di liderazgo di Evelyn Wever-Croes ken tin e vision, experiencia y capacidad pa guia y hiba nos pais pa dilanti.

​            “Tur otro mester refresh, reset y lanta nan nivel pa aki 4 aña purba di nobo, pero cu respet pa cada un, pero nan no a demostra di tin seriedad, capacidad, vision realistico ni experiencia y preparacion", e parlamentario a expresa.

​            Aruba ta den un proceso avansa di  recuperacion y no por permiti ni un "step back", ni chikito ni grandi. E risiconan y consecuencianan por ta devastador pa bienestar y futuro di nos pais. Compromisonan financiero, acuerdo y posibel solucionnan cu politiek Den Haag, y otro cuestionnan vital ta pidi un liderazgo firme y sabi. Aruba no por permiti ningun "laps or relapse".

​            Hendrik Tevreden ta termina cu un apelacion na e pueblo Arubano pa duna confianza na un gobierno cu ta comproba cu ta optimo pa e retonan grandinan di futuro: un MEP fuerte y lista capacita pa enfrenta e desafio pa bienestar di un y tur.