ATIA ta insisti cu Gobierno mester baha su gastonan

Herrick Henriquez, director di e Asociacion ta reitera:

Si ta baha gasto lo no mester di mes tanto entrada pa gobierno draai
Reaccion riba declaracion di DIMP 

ORANJESTAD (AAN) Señor Herrick Henriquez, director di Aruba Trading & Industry Association (ATIA) a comenta den un entrevista cu DIARIO, cu el a scucha e declaracion di señora Luenne Gomes-Pieters, directora di Departamento di Impuesto (DIMP), cu Gobierno a logra un surplus, y cu BTW lo mester a genera mesun entrada cu BBO.

Henriquez a menciona cu den pasado tambe, ATIA a bisa cu e gastonan di gobierno tin cu baha y si baha esey no mester di mesun tanto entrada di impuesto pa gobierno por draai.

E ora ey e placa di mas por wordo uza pa, por ehemplo, infrastructura, educacion, problemanan social. “Pues si mester, mester genera mesun cos nos no sa, esey ta algo di minister segun mi. Pero den pasado nos a bisa cu un sistema simple di BTW cu un porcentahe di un rate, ta na unda nos kier pa yega. Den pasado a presenta dos: 18% y despues a bah'e na 14% y ainda nos ta bisa cu un rate ta esun di miho, y esey tambe IMF a bisa na 2018. Y awo nos tin cu wak cu na 2022 tabata un aña hopi diferente cu 2024”, Director di ATIA a indica.

El a subraya cu 2024 ta bayendo hopi miho. “Nos ta na 110 of 120% compara cu 2019. Na 2019 tabata tin inflacion di dos cifra (riba 10%), awo inflacion ta bahando, nos a logra 3% y por premira cu lo bira 2.5% otro aña”, Henriquez a señala.

El a agrega cu awo cu ta bay tin eleccion, por mira cu tur partido politico ta pro un BTW, Algun ta bisa mas un ABB, style di Bonaire, otronan ta bisa cu un BTW mescos cu IMF (Fondo Monetario Internacional) a puntra p’e, eigenlijk un rate, anto b coi hopi di otro belastingnan y hinca nan den e BTW.

“Anto, esey tambe nos a propone, esun di mas simpel posibel, y unda nos si ta kere cu ta bay genera hopi mas placa ta, cu e complains. Esey ta algo cu ta den discusionnan cu Departamento di Impuesto awo, despues cu BBO na frontera a bin na vigor, nan a haya mas dato di hende y companianan cu nan por wak awo cu ta importa, pero nunca nan no a cumpli cu pago di BBO. Den combersacion cu Directora di DIMP y su team, nan a informa nos cu nan ta haciendo un ‘desk onderzoek’, unda nan ta purba di match e companianan cu e entrada di BBO, y unda e BBO ta keda. Pues e importacion y e pago di BBO”, director di ATIA a señala.

El a agrega cu eynan ta bay wak cu lo tin hopi mas complains, y e BBO na frontera ta generando hopi mas placa cu nan a premira. ATIA ta kere cu un BTW na frontera ta bay genera mas pasobra e tasa ta bay ta mas halto, e rate ta un tiki mas halto pero na final, e ta bay kita hopi otro belasting cu ta bay hinca den e BTW y na final tur hende ta paga. “Mas bo uza, mas bo gasta, mas lo bo paga” Herrick Henriquez, director di ATIA a remarca.