Varios Piscado a bay haya sa mas di instalacion di FADS den lama rond Aruba

Lo bay yuda captura di mas pisca

E ta pone piscanan bay busca refugio eynan y multiplica
Lo trece pisca manera Dorado, Buni, Mulato, Balahu y mas 

ORANJESTAD (AAN): Manera cu DIARIO a trece dilanti, tabata Diaranson anochi cu tabatin un presentacion special na tur piscado y personanan interasa pa atende un presentacion, special riba e asina yama “Fish Aggregating Devices” (FADs).

   Un tecnologia innovativo pa atrae pisca, cu lo worde instala den lama rond di e isla.

   Fish Aggregating Devices, of FADS, ta conoci como structuranan cu ta yuda pisca y especie marino grandi y chikito pa reuni den un area specifico. FADS por ta flotando na superficie, pero den e caso aki lo trata di e tipo ancra. E structura lo ta ancra na fondo di lama pa por atrae piscanan pelagico, manera Dorado, Buni, Mulato, Balahu y mas.

    E presentacion a enfoca riba con e sistema aki lo beneficia e piscadonan. FADs lo yuda cu aumento drastico den cantidad di pisca y pa haci pesca mas facil y eficiente, por ehempel lo bay directo na posicion di e FADS y asina gasta menos fuel.

   Tambe, tin mas potencial pa saca mas pisca den menos tempo riba lama y e lo ta beneficioso pa charter boats. Ademas lo tin aumento di consumo di pisca fresco, cual lo haci cu pueblo lo come mas saludabel. Por ultimo, e ta yuda cu impulso economico.

   A duna splicacion riba e siguiente pasonan pa instala FADS den lama di Aruba, pa asina lo por spera un impacto positivo riba pesca local. E diseño di e FAD lo ta un boei superficie cu structura nan sostenibel pa nos medio ambiente. Esaki nan lo worde ahusta cu Dyneema rope. E proceso di instalacion lo worde realisa uzando un plataforma/barge comercial y un boto di apoyo incluyendo buzonan pa inspecciona e conexion bou di e boei.

   Pa haci cu e FADs nan ta mas duradero, ta rekeri mantenimento y educacion di e usuarionan. No por mara na e FADsnan, no por pasa cu rosario cerca di e FADsnan y no por pisca cu e haas chikito rond di e FADsnan. Lo tin un sistema di comunicacion entre e usuario di e FADSnan y e team di Varadero, pa asina cu por tin problema por comunica esaki pa por atende cu ne.

   Instalacion di FADS ta un paso sumamente importante pa innovacion den pesca local. E structuranan aki ta crea un punto di reunion pa pisca di manera sostenibel, sin afecta habitat natural. Cu FADS, nos ta habri caminda pa sigui desaroya e sector di pesca y pa hacie mas organiza cual lo beneficia nos comunidad. Minister di Naturalesa kier a gradici tur persona cu a forma parti di e proyecto aki y cu a atende e presentacion.