Trump a bira prome reto grandi di ex lider politico Hulandes Rutte

Dependencia di mundo di Merca den Siglo 21 a bira visibel

*Como Secretario General di NATO, Rutte ta busca sosten di Trump

*Union Europeo a nace for di e concepto di Estadonan Mericano uni 

ORANJESTAD (AAN) — “Make America great again”ta e frase cu manera DIARIO a splica tabata e alma di e victoria di Donald Trump, cu Pueblo di Merca a bolbe como eligi como Presidente den un mundo yena cu conflicto y incertidumbre.

E posicion importante di Merca na mundo, ta bolbe hiba mundo na e momentonan grandi den historia, ora Merca manera DIARIO a splica su lectornan, a bira e pais cu a hiba mundo liber na triunfo den Segundo Guera Mundial.

Campaña politico di Trump semper a dirigi su mes riba e necesidad pa Merca bolbe goza e lugar importante den e plataforma di mundo liber, cu DIARIO na tanto ocasion a mustra cu tabata parce perdi si tene cuenta cu e forma cu por ehempel Gobierno Biden a atende cu Venezuela.

“Make America great again”sigur tabata e frase cu ayera a haci cu e triunfo electotal di Donald Trump no tabata solamente asunto di Pueblo di Merca, pero di asunto mundial.

E reaccion di paisnan Europeo a duna prueba di e impacto di victoria di Trump, cu a entrega na e ex Prome Ministro di Reino Hulandes, e prome reto grandi como secretario general di Organisacion di paisnan Noord Atlantico cu a nace despues di Segundo Guera Mundial entre Merca y paisnan liber di Europa.

NATO tabata e arma grandi di Europa despues di Segundo Guera Mundial y Merca tambe a sigui cu su participacion directo na e Alianza cu ta exigi participacion financiero di e paisnan cu ta forma parti.

Donald Trump na hopi occasion a mustra cu e no tabata di acuerdo cu e tratado cu ta produci placa pa proteccion di e paisnan Europeo pero cu segun Trump no mester wordo paga for di e cartera di e ciudadano Mericano cu ta paga belasting.

Basta conmocion a nace ayera cerca paisnan Europeo, cu ta mira den e gobernacion di Trump pues e posibilidad cu Merca ta retiro su asistencia na Europa loke no ta zona asina straño debi cu ta hustamente e forma con capitalnan enorme di Merca ta bay exterior, ta haci cu na Merca mes e pagador di belasting no ta mira loke e kier mira su pais produci pa su belasting di placa.

Mester bisa cu e concepto di Europa tin basta resultado pa mundo debi na e hecho cu e Union Europeo a crea for di paisnan Europeo un alternativa contra e Union di Estado cu a bira Estados Uni di Merca.

Na Europa mes tin varios pais cu ta contra Union Europeo manera e partido mas grandi di Hulanda mes, pues e posicion di Trump por tin resultado hasta pa e gobiernonan cu no ta mira e balor di e Union Europeo, por duna mas forsa na cambio den e union drastico Europeo.

En todo caso Donald Trump a bira e prome reto grandi pa ex Prome Ministro di Reino, Mark Rutte cu awor ta Secretario General di NATO y a bisa cu e ta bay drenta den contacto directo cu Donald Trump, como su prome reaccion riba e resultadonan di eleccion na Merca.

Rutte ta kere cu sigur e por conta cu Trump enfrente e amenaza di Iran, China, Korea del Norte y Rusia pa Europa, manera el a trece dilanti.

Segun Rutte e amenazanan cu tin actualmente pa Europa despues lo bira amenaza tambe pa otro partinan di mundo y esaki ta loke e kier trece dilanti na Donald Trump, cu e ta mira como un persona cu lo tin atencion serio pa e tema aki.

Segun Rutte cosnan a bay bon entre Donald Trump y su persona, tempo cu e tabata Prome Ministro Hulandes.

Rutte lo bay di acuerdo cu Trump cu paisnan Europeo mes lo mester produci mas placa pa atende cu e problemanan cu nan ta enfrenta di e paisnan menciona. Rutte ta kere tambe cu Trump y e Presidente di Ukraine lo por yega na bon entendimento, pues e ta mira cu un Gobierno Mericano dirigi pa Trump lo por ta un aliado pa Europa.

E impacto cu eleccion di Trump a haya ayera na Europa sin duda ta duna prueba na e hecho cu e Pueblo Mericano cu tanto pais na mundo ta mira como nan fuente di solucion riba tur tereno, mester recobra tambe su postura di grandeza y cu mundo mester acepta cu Merca ta un pais poderoso, great!