Castigo combina pa trio envolvi den exporta 4 kilo di cocaina

Trahadornan di Groundhandler na Aeropuerto

Atrapa baggage handler hincando droga den maleta den Avion 

ORANJESTAD (AAN): Diahuebs e hombernan R.R.T. di 19 aña, Y.A.B. di 25 aña, y e muher J.B. di 35 aña, tur di Aruba, a presenta dilanti Hues pa duna cuenta pa e delito cu nan a haci. Tur ta worde acusa cu 7 October 2023 a exporta 4 kilo di cocaina.

   E droga tabata scondi den un faha cu mester a worde hinca den un maleta ora e maleta ta hinca den avion. Autoridad a sorprende un di e sospechosonan trahando como Baggage Handler, kende e momento ey kier a hinca e faha y asina a gara e trio.

   Exporta Cocaina: Hues bisa cu R.R.T. a admiti na Polis cu e ta envolvi. Segun su declaracion na Polis, el a haya un faha di e homber Y.A.B. cu 4 kilo di cocaina aden. Y.A.B. a bisti e faha y mira si e ta riparabel. Ta asina cu R.R.T. tabata traha pa un compania di Groundhandling na Aeropuerto di Aruba, y como un ‘Baggage Handler’ ta encarga cu hinca maletanan den avion. Y.A.B. tambe tabata traha na e Groundhandler pero a worde kita algun dia promer. Door di esey, Y.A.B., cu a acepta e oferta di e muher J.B., a acerca R.R.T. caminda a ofrece 1.500 Dollar. E palabracion ta cu R.R.T. lo drenta aeropuerto cu e faha bisti na su curpa y despues lo hinca esaki den un maleta cu lo bay den avion.

   Na aeropuerto, R.R.T. a missed-call Y.A.B. pa laga sa cu e ta paden. Y.A.B. a manda R.R.T. potret di e maleta den cual mester hinca e faha. R.R.T. tabata den e compartimento di baggage di e avion y a tende cu autoridad ta bay controla e maletanan. El a spanta, kita e faha, bent’e banda di e maleta y core bay.

   Miembronan di autoridad a mira e movecionnan sospechoso aki y a logra detene R.R.T.

   Den Corte, Hues a puntra R.R.T. si e tabata sa cuanto droga e tabatin. R.R.T. a bisa Hues cu e no sa cuanto droga sino a bay pa e placa pasobra e tabata den situacion financiero dificil.

   Taxista a feed e droga: E muher J.B. a bin cu e storia y declara na Polis cu el a worde acerca pa un taxista pa hiba droga y el a acepta.  E muher J.B. a acerca Y.A.B. pa haci esaki. Na dado momento J.B. kier a distancia pero door di menaza e mester a sigui.

   Den Corte para, e muher J.B. a bisa Hues cu e tabata cana cu su yiu y for di un auto color scur, un persona a saca man manera ta un pistool y haci manera ta tira riba dje y su yiu. Esey a pone cu el a sigui cu e exportacion di cocaina.

   El a acerca Y.A.B. pa haci esey, y Y.A.B. a bay di acuerdo. El a haya un faha y a duna Y.A.B. esaki. Ora Hues a puntra J.B. si esey ta e faha cu R.R.T. a haya, el a bisa cu e no conoce R.R.T. y no a dun'e faha.

   J.B. a bisa cu el a duna Y.A.B. e suma di 2 mil Dollar y despues a duna e pareha di Y.A.B., 1 mil Florin ora cu Y.A.B. a cay sera.

   Hues a remarca cu e chauffeur di Taxi no a worde deteni y tampoco interoga. Hues a mustra cu Y.A.B. a declara cu J.B. a duna R.R.T. un faha. Ora cu Hues a mustr’e riba declaracion di J.B., el a bisa cu e no ta bisa nada.

   Hues a mustra cu R.R.T. a bisa cu Y.A.B. a hiba e faha p’e y a bistie pa mira si e ta riparabel. Y.A.B. a bisa cu e no a haya placa di J.B., manera J.B. ta bisa. J.B. a bisa cu e lo mester a haya 500 Dollar pero no a haya nada.

   Hues a bisa cu Reclassering a traha raport di R.R.T. Ta asina cu R.R.T. ta uza marihuana y lo ta bon si e ta haya ayudo pa e stop di usa. R.R.T. a bisa Hues cu e ta di acuerdo cu esey. Tambe Reclassering ta conseha pa R.R.T. sigui curso di controla agresion. R.R.T. a bisa Hues cu antes e tabatin e problema ey y a sigui curso y ta bou supervision di Reclassering.

   Fiscal a exigi castigo combina: Fiscal a bisa Hues cu R.R.T. tabata traha na Aeropuerto y 7 October 2023, el a haya un faha cu droga. Na dado momento R.R.T. a spanta cu lo bay controla avion y a core bay. Asina a detene R.R.T. y el a basha abao tur cos, bisando cu ta Y.A.B. a dun’e faha pa e hinca den un maleta. Y.A.B. a mand’e potret di e maleta den cual e mester hinca e faha cu droga aden.

   Fiscal a sigui bisa cu J.B. a worde interoga y a bisa cu un Taxista a bis’e pa hiba droga. Fiscal ta haya cu tur tres tabata envolvi den exporta cocaina. Pa cu e castigo, Fiscal a bisa cu e ta tene cuenta cu tur tres acusado awor tin trabao. Tur tres a haci’e door di situacion financiero dificil. Tambe Fiscal a mustra cu J.B. a worde menaza. Fiscal a exigi trabao pa comunidad di 200 ora of 100 dia cera. Tambe el a exigi 1 aña di prison condicional cu 3 aña di prueba.

   Abogadonan: Abogado mr. Carlo di e baggage handler R.R.T. a bisa Hues cu R.R.T. a hay’e ta haci algo cu a cambia su bida. E tabata traha pa un compania di Groundhandler na Aeropuerto pa riba plataforma, subi den bodega di avionnan y hinca maletanan den avion hunto cu Y.A.B.

   Ta asina cu Y.A.B. a worde kita y el a pidi R.R.T. pa pone e faha den un maleta den un avion pa asina e droga worde hiba. El a worde sorprendi durante control di autoridad y el a core bay pero a worde gara. Ta door di situacion financiero dificil, el a dicidi di hacie pero e no a resulta. mr. Carlo a bisa Hues cu R.R.T. a coopera completo cu investigacion. El a pidi Hues pa duna castigo igual na loke el a sinta caba.

   Abogado mr. Falconi di e muher J.B. a bisa Hues cu J.B. a actua bobo, a worde menaza door di e Taxista y tabata den un situacion financiero malo. El a pidi Hues pa tene cuenta cu e situacion familiar di J.B., kende tin 3 yiu.

   Abogado mr. Edwards a bisa Hues cu e ex-Baggage Handler Y.A.B. su participacion tabata minimal. Door cu el a worde kita for di e compania na aeropuerto, el a acerca R.R.T. pa haci e trabao di pone e faha cu droga den e maleta. El a worde acerca promer door di e dama J.B. E abogado a mustra cu J.B. ta purba tira culpa riba Y.A.B. siendo cu ta J.B. ta esun na cabez. E abogado a mustra cu Y.A.B. a bisa Polis cu e no a haya ningun cen. No ta asina cu el a haya casi 4 mil Florin.

   Sentencia: Hues a sera tratamento di e caso y a dicta sentencia di biaha. Hues ta haya tur tres culpable di complice di exporta cocaina. Tur tres tabatin un funcion pa e droga aki bay den exterior. Ta 4 kilo di cocaina nan kier a manda pa exterior. Hues ta haya cu e exigencia di Fiscal ta na su lugar.

   Pa cu e castigo, Hues a bisa cu teniendo cuenta cu tur tres ta lamenta loke a sosode y actualmente tin trabao, el a confirma exigencia di Fiscal. R.R.T., Y.A.B. y J.B. a worde condena na 200 ora di trabao pa comunidad of 100 dia sera. Tambe 1 aña di prison condicional cu 3 aña di prueba.