Na Aruba ainda no tin ley cu ta regula tarifanan pa cobra pa uso di POS-Machines

Banco Central a reacciona riba tarifanan di Debit Card

Banco Central cu nan I-Pago explorando solucionnan di pago innovativo 

ORANJESTAD (AAN): Banco Central di Aruba (BCA) a tuma nota di e publicacionan den medionan di prensa relaciona cu e preocupacion pa e tarifanan cu banconan comercial ta cobra pa usa servicionan di pago cu carchi, principalmente e asunto di 2,0% transaction fee di Debit Card.  Pesey riba Diaranson atardi, Banco Central a emiti e declaracion aki.

   Banco Central ta splica cu actualmente no tin un ley pa regula tarifanan cu e banconan local ta cobra pa uso di servicionan di pago na Aruba. E banconan comercial por stipula e tarifanan aki nan mes. Den cuadro di su ambicion pa modernisa e sistema di pago na Aruba y mehora e experencia di pago pa e consumidor y negoshi, BCA a tuma e iniciativa pa prepara dos concepto di ley pa asina por regula e sistemanan di pago na Aruba.

   Ta trata di e concepto di leynan: “Landsverordening toezicht betaaldienstverleners” y tambe “Landsverordening toezicht aanbieders van betalingssystemen”.

   Actualmente e dos concepto di leynan aki ta den e proceso legislativo. Cu e concepto di leynan aki e meta di BCA ta pa establece sistemanan di pago na Aruba cu ta sigur, eficiente, confiabel y cu tarifanan rasonabel.

   Sistema di I-Pago di Banco Central:  Ademas, construyendo riba e exito di e introduccion di I-Pago (Banco Central di Aruba su sistema di pago instantaneo) na 2020, Banco Central tambe ta explorando solucionnan di pago innovativo pa por ehecuta pagonan di ‘person-to-person’, ‘in-store’ y ‘e-commerce’, usando e sistema di I-Pago.

   Cu e solucionnan menciona lo introduci mas servicionan di pago cu lo contribui na un sistema di pago mas moderno pa Aruba, cual lo usa e sistema di pago instantaneo local.

   Asina por tin mas control riba e tarifanan di transaccionnan di pago y tambe lo por reduci e dependencia riba rednan di pago internacional. Relata na esaki, BCA ta colaborando cu e banconan comercial pa sigura un implementacion exitoso di e iniciativa aki.

   Cu e iniciativanan menciona BCA kier sigura e comunidad cu ta haciendo esfuersonan significante pa logra sistemanan di pago mas regula, sigur y moderno.