Comerciantenan ta spera cu Gobierno atende e ‘fee exorbitante’ di banconan pa Debit Cards

Idea pa crea un ‘carchi’ completamente local

ORANJESTAD (AAN): Frans Ponson di Comerciantenan Uni di Aruba (CUA), a divulga cu nan a keda sorprendi cu na un forma scondi, banconan a bin ta hisa nan ‘transaction fee’ pa Debit Card ora cu bo paga na Cashier di mayoria tienda y supermarket usando e POS-Machine.

   Segun Ponson, e porcentahe antes tabata 0,5% di e suma di transaccion, pero awor el a subi y yega te na 2,0 porciento.  Na su opinion, Gobierno di Aruba tin di bay atende e asunto aki na un forma urgente.

   Comerciantenan pues a habri siman cu keho, pero alavez ta purba na bin cu solucion di biaha, y nan tin esey tambe cla pa presenta na Gobierno riba e asunto aki.

   Ponson ta spera cu Gobierno lo bay deal cu Banco Central, tambe yama Asociacionnan di Banco, y busca forma pa elimina e transaction fee aki specialmente pa clientenan di banco local, usando aparatonan local di POS-Machine na Aruba.

   Segun Frans Ponson, el a reuni cu un Banco caba riba e asunto aki, y el a haya indicacion cu e institucionnan bancario por “haci’e local pa Aruba”.

   “Ademas, nos por haci’e pa Antiyas, Aruba cu Curaçao y Bonaire,” Ponson a bisa den mesun rosea.  Aki ta introduci e plan pa bin cu un carchi local pa pueblo di Aruba, unda esaki ta funciona solamente sea na Aruba of Islanan ABC so.

   “E ora bo ta proteha e ciudadano di no tin tur e gastonan aki.  Anto ora di usa e carchi cu lo funciona via un network funcionando na Aruba so, e ora Gobierno por exigi tur banco pa traha hunto pa local, cu un transaction fee razonabel, y e ora bo ta protehando y bin cu un carchi pe.”  El a bisa cu bo por keda cu bo Debit Card y Credit Card tradicional, si acaso bo kier sigui viaha y haci compras online.

   “Pero shonnan, si no bin cu un solucion rapido y no dicidi ki pa haci, pueblo ta suficiente inteligente pa sa ta ‘kende lo bay page’.” Ponson a bisa.  El a recorda con ya caba ta pagando BBO cu su porcientonan, y awor ta bin cu e transaction fee di Banconan... lo pone cu tur hende lo ta pagando 10% total ora di haci compras.

   Mensahe a bay pa tur negociante pa bay controla nan cuenta di Debit Card pa nan mira con e transaction fee a subi sin cu hende tabata sa.  Den fin di siman ora cu a notifica algun comerciante, nan a keda babuca, y hasta casi haya un ‘nervous breakdown’ pa mira e suma.  Y ta pone urgencia pa asina busca un solucion urgent pa e situacion aki.