Reduccion den fase di orario laboral y introduccion di ley BEL lo yuda tanto dunador di trabou como trahadornan

Otmar Oduber durante conversacion cu ATIA

ORANJESTAD (AAN):  Otmar Oduber tabatin e honor den pasado pa cuminsa cu e proceso di reduccion di orario di trabou di 48 pa 45 ora pa siman y tur hende por a wak e efecto positivo di dje. Lamentablemente no a continua cu e proceso aki y reduci e orario te 40 ora pa siman, pero PPA ta propone pa den fase durante e proximo 10 aña yega na 40 ora pa siman. Esaki kiermen cu mester cuminsa de inmediato di un plan di accion.

            A papia cu ATIA tambe riba dunadornan di trabou, cual hopi di nan ta bon, pero tambe tin otronan cu no ta cumpli cu e incentivonan cu e empleadonan merece di haya. Pesey a papia riba e ley BEL, Beneficio Economico Laboral, cu ta duna un incentivo na e trahador pa forma parti di e empresa caminda nan por tin un entrada mas halto sin cu mester paga impuesto riba dje y sin cu e ta gastonan adicional cu e dunador di trabou tin pa loke ta trata e ‘secundaire voorwaarden’ y dunando un reduccion di 100% riba winstbelasting. Esaki lo haci’e atractivo pa tanto e dunador di trabou como pa e trahadornan aumentando e eficiencia y productividad na pia di trabou. A papia abiertamente cu ATIA riba e tema aki, logicamente nan tin nan preocupacionnan y miembronan di PPA a capta esakinan tambe.

            A papia tambe riba conversacionnan cu tabatin entre sindicatonan y gremio comercial, cual ta hopi positivo, pasobra mescos cu ta duna e siguransa di entrada pa por tin un miho porvenir, mescos tambe mester tin e flexibilisacion cu e doño di trabou tambe por ta sigur cu e tin na su disposicion e miho trahadornan pa produci pa su compania.

            Otmar Oduber a expresa cu PPA ta e unico partido cu ta papia no solamente di e cambionan cu kier mira of problemanan cu nan ta identifica, pero tambe ta bisa con ta bay hacie y pa nos comunidad tin un miho biba.

            Na final el a bisa cu e reunion positivo aki cu ATIA, ta e comienso di e cambio cu kier mira pa futuro despues di 6 di december ora cu gobierno cambia y haya e sosten di pueblo pa por ehecuta esaki den Parlamento, pero tambe como parti di e proximo gobierno.