Coriendo verboden y ocasiona accident riba overpass na Hato

Atrobe otro caso di ‘spookrijder’ riba WVB Boulevard

ORANJESTAD (AAN): Tabata na comienso di October cu un persona femenino tras di stuur, a sali for di Kooyman Super Store y a bay zuid den verboden riba WVB Boulevard.  Na Hulandes, e coremento aki den verboden riba un highway ta ser yama ‘Spookrijder’.  El a ocasiona un accident fuerte cu a laga hende herida.

   Diamars anochi banda di 7:00 pm, atrobe un otro accident a keda registra riba WVB Boulevard cu un otro ‘Spookrijder’.

    E biaha aki pa motibo desconoci, e persona tras di stuur di un Nissan March na rotonde di Ponton, a subi e via robez y a bay pabao rumbo Bushiri coriendo completamente den verboden.

    E persona coriendo den e Nissan March a pasa riba e overpass di Hato, y bahando bek a sorprende trafico cu ta bayendo pariba.

    Riba e potret aki por mira con un di e autonan a dal un brake maratonico prome cu e accident aki a socede.  Tanto Polis y tambe Forensys a yega eynan pa atende e accident, unda e bon noticia ta cu e biaha aki no tin ningun hende herida.