Polis a logra detene e muher cu a comete Hit & Run fatal di Diadomingo

El a ser aresta na Primavera

E auto compacto Honda Fit a wordo kima full na Wela 

ORANJESTAD (AAN): E caso di accident fatal di Diadomingo marduga riba caminda di Tanki Leendert pa Paradera na altura di Tao Bao Store na Shiribana, a keda como topico di combersacion.  Hopi hende tabata puntra nan mes con por ta cu e persona tras di stuur no por tin ni 1 milliliter di consenshi di loke el a comete e marduga ey.

   DIARIO den su edicion di Diamars a publica cu testigonan a mira cu un auto compacto Honda color ros ta esun cu a dal e victima riba e E-Scooter y a sigui core bay direccion pariba y desaparece.

   A cuminza pidi ciudadanonan cu por tin informacion, pa yama Tipline di Polis na 111-41.

   Altocomisario Ramon Arnhem tambe a bin dilanti y haci suplica na e persona tras di stuur di e auto, pa e entrega su mes.

   No tin intencion di entrega: Pero despues di dos dia a bin realiza esaki!  E persona cu tabata tras di stuur di e Honda ey no tin ningun intencion di entrega su mes.  A dune chens pa e asumi responsabilidad como un adulto, y presenta na cualkier Warda di Polis.  Pero e no a haci esey.

   E ora ey, Polisnan cu sosten di team forensico di BFTO cu a check tur detaye, y tambe revisa Security Camera di diferente negoshi eybanda, a sigui cu e investigacion.  Asina a bin realiza cu ta trata aki di un auto compacto Honda Fit.

   Tambe riba caya, Polisnan tabata controla tur Honda Fit cu por ta sea color ros, of color cora, of color mas cla pa check si por tin daño material.

   Auto haya na Wela: Diamars den oranan di mainta, a bin haya sa cu den area di Wela cerca di Franse Pas, tin un skelet di auto tur kima.  Autoridad a bay eynan, y a bin haya un auto parecido na un Honda Fit recien kima.

   Aki a manda Recherche y team forensico di BFTO pa check si por haya detaye di e auto aki, incluyendo VIN-number of e Motor-number, cu por yuda localiza e nomber di e doño, of a lo menos e nomber di e persona cu a keur e auto aki.

   E descubrimento di e auto aki tabata un wake-up call pa autoridad, cu e persona cu a dal e dama mata na Shiribana, cueste loke cueste tin intencion di sconde y no para responsabel pa e acto.

   Cu takelwagen a lanta e auto di eynan, y a bay cune na Warda di Polis na Balashi pa haci analisis mas amplio riba dje.  Y como cu tin urgencia pa localiza e persona cu tabata tras di stuur, a acelera e proceso aki pa purba saca mas informacion di e auto kima.

   Aunke vocero policial no a duna indicacion di esey, toch ta parce cu haciendo analisis na Balashi, a bin haya detaye valioso na e auto aki pa asina por a cuminza haya un adres.

   Aresto na Primavera: A ricibi tip cu semper tin un Honda Fit color ros similar cu ‘Rose-Gold’ para dilanti e adres Primavera 89.  Pero desde Diadomingo hendenan eybanda no ta mira e auto ey mas eynan.

   Ora cu e investigadornan tabatin suficiente informacion, a pidi yudansa di varios unidad di Polis, incluyendo Motor Units pa acudi na e cas.

   Aki nan a drenta e cas, y a aresta e muher di inicial A.C.C.D. di 30 aña di edad, naci na Venezuela.  A pone boei na su mannan y a bay cune Warda di Polis pa asina cuminza investigacion.  Na e cas a mira un otro Honda Fit color blauw scur staciona.

   E hecho cu a kima hasta e auto ta mustra cu e caso aki a subi varios nivel bay halto den grado di seriedad.  Pasobra aki a envolvi mas hende pa yude bay kima e auto aki den lugar aleha cerca di Wela.

   Vocero Policial Liliana Rasmijn, a hasta indica cu no ta descarta cu lo bin mas detencion relaciona cu e caso aki.

   Investiga henter e spectrum: Ademas di tur esaki, lo bay analisa e teoria tambe cu loke a socede no tabata un ‘accident’, pero lo por ta un caso di asesinato pre-medita cu por a wordo mira como un boksmento.  Ta bay check tur e detayenan aki, y ta di spera cu famia- of amigonan di e victima Julieth Patricia Patiño Castro lo por duna detaye, y si acaso nan a yega di mire ta papia cu e muher riba e potret aki, cu posiblemente tabata e persona tras di stuur.

   Of djis esaki ta un accident lamentabel, y pa un motibo of otro e muher Venezolano no kier wordo gara.  Aki tin di bay investiga e motibo tambe pakico a trata na sconde.

   Algo cu ta bira dificil awor despues di dos dia, pa proba cu e muher tras di stuur lo por tabata bao influencia.  Como cu ya ningun detector lo no por haci ningun analisis, como cu e organo di higra ya a filtra tur alcohol y saca afo.

   Esnan cu por tin informacion balioso, ta ser conseha pa yama Tipline di Polis na 111-41.  Corda cu bo ta wordo garantiza di lo keda anonimo.

   E caso aki posiblemente ta yega na un nivel, unda e muher lo bay pasa Pasco y Aña Nobo venidero cera den prison pendiente pa e caso wordo presenta den Corte di Husticia.  E hecho cu el a huy, a sconde, y pa colmo hasta tribi di kima un auto completo... lo pone oficialnan hudicial traha extra hopi e dianan venidero pa resolve e puzzle aki.