Testigonan a mira cu ta un Honda color ros a dal ciclista mata na Shiribana

Te ainda e persona no a entrega su mes

 *Pueblo por yuda localiza e auto! 

ORANJESTAD (AAN): Tabata Diadomingo marduga pa 1:10 am cu un accident fatal a keda registra riba e caminda di Tanki Leendert pa Paradera, net dilanti establecimento di Tao Bao na Shiribana.

   Testigonan a bisa cu un auto cu ta parce di ta un Honda color ros moviendo direccion pariba, ta esun cu a dal den loke na Merca ta wordo yama “Electric Scooter”, pues un bicicleta estilo ‘Step’ cu tin bateria.  E golpi tabata mortal pa e dama Julieth Patricia Patiño Castro di 35 aña di edad.  Eybao mes el a fayece.

   Ta ser menciona cu e E-Scooter aki ta e mobil principal cu e dama ta uza pa transporte pa y for di trabao.  E impacto tabata fuerte, cu a laga e dama cu heridanan fuerte, y e E-Scooter tambe a keda basta kibra.  E helm cu e dama tabatin riba su cabez a zwaai y kita cay abao.

   Nan a mira cu e Honda color ros a djis sigui core bay pariba direccion di Rotonde di Paradera.  Esaki lo bay ta util pa Polis revisa nan mesun red di camera instala rond di Aruba, y tambe check negoshinan eybanda cu lo tin camera dirigi pafo.

   Check e auto na cas:  Si acaso abo tin famia cu tin un Honda color ros, ta bon pa bo check si acaso e tin golpi na e vehiculo.  Golpi lo por ta basta extenso, mirando e sla cu e victima a ricibi.

   Hecho ta cu si acaso e persona tras di stuur tabata burachi, e chens tey cu e lo no tabata sa mes cu el a dal hende cu auto. 

Altocomisario di Polis a pidi pa chauffeur di accidente fatal entrega su mes Altocomisario di Polis drs. Ramon Arnhem ta haya cu ta INACEPTABEL cu chauffeur involucra den accidente fatal ainda no a entrega su mes.

Pa Arnhem esaki ta hopi lamentabel cu e persona cu a dal e victima no a para y baha brinda yudansa na e victima pero a sigui maneha su vehiculo bay manera nada no a pasa y bandona e sitio. Arnhem ta haci un suplica pa e chauffeur entrega su mes na un di e wardanan di polis. Y si abo ta na altura di ken a comete e crimen aki y bo ta yudando nan sconde y/of drecha e auto of bo ta haci algo pa stroba e investigacion, abo tambe ta culpabel pa ley! Si abo sa cu diripiente un bisiña di bo tin golpi inexplicabel na su auto, bo por yama Tipline di Polis na 111-41 pa asina duna detaye di esaki.  Corda cu bo por keda anonimo, y polis ta garantiza esey. Tambe por yama departamento di Trafico y duna informacion na number di telefon na: 597-5190 / 597-5194 / 597-5190.