Abuso di democracia no por bira instrumento pa aplasta hende!

Prensa mescos cu Parlamento, Gobierno y Justicia mester tin regla

*Periodismo y Publicidad no por kibra e derecho di hende como hende

*Inventonan di prome 25 aña di Siglo 20 no por crea superioridad falso 

ORANJESTAD (AAN) — Montesquieu tabata nomber di e filosofo, cu a presenta e argumento cu por wordo considera como e base pa e sistema pa medio di cual Aruba ta wordo goberna.

Montesquieu a presenta e balansa di poder entre Rey y Parlamento, cu ta un situacion cu Aruba sigur mester por conoce cu su monarquia constitucional, cu un Rey como Hefe di Estado y un Parlamento eligi pa Pueblo, cu ta dicidi con Gobierno lo ta.

Husticia a bira e tercer parti di e asina yama “Trias Politica”cu den transcurso di tempo a bira modelo pa paisnan democratico.

Den transcurso di tempo, medionan di comunicacion cu a haci nan entrada, a wordo presenta como poder number cuatro, a base di e forsa cu un medio di comunicacion tin den e sistema democratico.

Un medio di comunicacion ta e contacto entre miembronan di un comunidad.

Johannes Gutenberg a introduci e revolucion escrito pa medio di prome machine di imprenta y asina a habri porta pa comunicacion.

Gutenberg na 1455 a imprimi e prome Bijbel y asina a habri porta pa awe entre otro DIARIO, por alcansa publico den un rato.

Prome cu esaki por a bira realidad, textonan incluso buki y noticia, mester a wordo skirbi na man.

El bira a base pues pa medionan di comunicacion, cu despues cu invento di radio, comunicacion, computer y asina lo sigui, lo permiti hende comunica cu otro.

Comunicacion a bira e arma grandi di e revolucion cientifico na mundo ya cu e ta  habri porta nobo pa hende atende cu otro.

Den e edicion di awe nos no ta drenta ainda e ambiente di medionan social, cu ta haci posibel pa hende comunica cu otro manera What’sApp y Facebook, pero nos ta tene nos mes na e ramo mundial di comunicacion mara na e practica di periodismo.

Comunicacion ta inseperabel di e bienestar di hende y esaki a bini dilanti den e epoca di Covid-19, ora comunicacion rapido y intercambio di informacion a scapa Millones di hende di morto.

Comunicacion ta indispensabel pa un comunidad, cu ta un conhunto di hende cu na un forma regla, ta comparti e trabou necesario y goza hunto di e resultadonan.

Esaki ta e base di democracia, cu no ta acepta abuso di poder di ningun instancia of persona cu mester actua di acuerdo cu reglanan di ley cu ta base di un convivencia democratico.

Tur hende mester acepta ley y regla ya cu den un comunidad democratico ningun hende por posicion su mes riba e Orden di Ley.

E Separacion di Poder di Montesquieu tabata pa preveni abuso di Rey of gobernante eligi, pero asina tambe ta base di prevencion cu un posicion of un trabou, por entrega na hende e arma pa e destrui bienestar di otro of pa un hende actua contra ley cu henter comunidad mester representa.

Durante e prome 25 aña di 2025, ciencia a avansa y a entrega na hende armanan nobo pa pensa cu nan ta poderoso pasobra nan por kibra of sostene un persona.

Esaki ta bay contra e pensamento di e separacion di poder, cu ta haci cu husticia mester ta ciego ora e enfrenta un miembro di Parlamento of un gobernante.

Pues tur hende mester tene su mes na regla a base di respet pa hende y ley.

Mester spera hasta cu esnan den funcion publico importante y periodista, ta e prome cu ta coopera na un comunidad ordena, cu no por kibra regla y orden publico di un pais.

Derecho di un ciudadano, ta uno di e logronan mas grandi di hende y sigur den e prome 25 añanan di Siglo 21, a bini dilanti.

Nacionnan Uni a entrega 17 punto como condicionnan basico pa na 2030 e bienestar basico di e ser humano bira realidad na mundo, cu no por conoce dominio a base di poder di un puesto cu tin den comunidad.

Periodismo mester garantia esaki y periodismo mester bira modelo pa e mundo den cual su trabou ta comunicador, e profesion cu cual e ta gana su entrada pero na mes momento mester hacie defensor di e bienestar di hende, comunidad y mundo den cual e ta sirbidor y no manipulador of dictador!