Preparacion pa eleccion dia 6 di December proximo ta, crioyamente bisa, “biento en popa”!

Minister Presidente y lider di Partido MEP, Evelyn Wever-Croes:

ORANJESTAD (AAN) – Minister Presidente y Lider di Partido Movimento Electoral di Pueblo, mr. Evelyn Wever-Croes, a comenta den entrevista cu DIARIO, cu e preparacion pa eleccion parlamentario di Aruba, dia 6 di December proximo, ta bayendo hopi bon, pues crioyamente bisa:“biento en popa”.

El a expresa cu tur cos ta segun planning. Tin e Conseho Electoral di cual su presidente ta señor Marchena y su vice-presidente ta señora Griffith, y ta sigui tres miembro mas cu ta wordo apunta pa e tres partidonan mas grandi: AVP, MEP y RAIZ.

Nan a tene nan prome reunion, cual Minister Presidente a atende tambe, como lider di MEP. E reunion a bay bon unda nan a enfoca riba concientizacion, a splica mas tocante con e proceso di voto ta, pakico ta importante pa eherce e derecho di voto, pues tur esey ta den nan man.

Nan ta organiza y tin cu percura pa e eleccion wordo bon organiza. Wever-Croes a menciona cu e draaiboek ta traha, y cada departamento a duna su contribucion y esun di DOW ta hopi importante.

E dignatario a comenta tocante director di DOW cu a entrega su retiro pa fin di e aña aki. E tin varios dia di vacacion ainda, pero den consulta nan a yega na e conclusion cu esaki no ta e momento pa e bay, pasobra ta importante p’e tey y yuda coordina eleccion un biaha mas, y e ta dispuesto pa haci esey tambe.

Di parti di Censo nan ta trahando full cu tur loke tin, pasobra e tambe tin un rol hopi importante. Antes, bo ta weita Censo como e cara di eleccion. Esey no ta e caso mas, eigenlijk nunca ta suppose di tabata asina. Ta Conseho Supremo Electoral ta e cara y eynan señor Marchena ta e Presidente, cu ta dunando cara caba. E mandatario a bisa cu nan tambe ta preparando tur cos, y for di trempan.

E dama a comenta cu e fondonan no ta aloca pa e aña aki, pero pa e otro aña, awor mester wak con nan ta bay hinca nan pa e aña aki, pero esaki ta algo cu nan tin cu soluciona.

“Mi ta contento di mira cu Conseho Supremo Electoral ta mas activamente bezig tambe, pa duna informacion, splicacion, y pa tin contacto y engage cu e partidonan politico”, Minister Presidente a duna di conoce.