Team di Aresto na forma tactico a domina homber cu cuchiu den man

ORANJESTAD (AAN): Diamars anochi Central di Polis a manda unidad di Playa pa bay den area di ex-Las Caleñas na Madiki cerca di Driemasterstraat. 

Hendenan a yama Polis cu tin un homber peligroso ta cana cu cuchiu den man.

   E unidad di Polis cu a yega, a bin topa cu e homber aki cu e cuchiu, y esaki a bira un situacion basta peligroso. E patruya cu ta consisti di 2 agente, no a pensa dos biaha y a pidi refuerso di mas Polis cu a sa di yega mesora.

   Oficialnan a papia hopi cu e homber, pero e no tabata preocupa di loke Polisnan ta bise.  Na final no a keda nada otro pa pidi pa e team tactico di polis cu ta RRT (Rapid Responder Team).

   Despues casi mey ora, e team a yega y nan a para dilanti e homber cu ainda tin cuchiu den man, y a keda papia cu ne. Pero tampoco e tabata razona cu e oficialnan aki.

   Diripiente nan a usa un tipo di “flash-bom” pa a distrae e homber cu tabata tin un cuchiu grandi den su man drechi. Ora cu esaki a explota, nan a usa bala di rubber y a asina a bula riba e homber y pone abao na suela.

   Testigonan eynan a bisa cu e homber aki un rato prome lo a haya un discusion serio cu su tata; y parse cu e tata lo a dal’e varios biaha cu palo. Posiblemente di rabia e lo a pasa man pa un cuchiu y lo tabata dispuesto pa haci algo.

   E homber a wordo transporta pa warda, unda eynan lo bay saca afor kico tur ta pasando; y si e lo mester papia cu Bureau Slachtofferhulp pa asina haya e ayudo cu e mester.