Parlamento a entrega su balor di baluarte di autonomia!

Prome 25 aña di Siglo 21 a bira atentado contra Status Aparte

*Benny mester aproba eventual Ministro pa reemplaza Glenbert

*Retiro di sospechoso Glenbert mester manda delincuente Benny cas 

ORANJESTAD(AAN)—E dignidad di Aruba como pais autonomo cu tur loke esaki ta nifica pa e Arubiano, tabata e lucha grandi di Siglo 20 y su culminacion na entrada di e ultimo 25 aña di Siglo 20.

Central den e lucha di Aruba tabata e forma cu Aruba tabata representa den Parlamento di Antia, a base di cambio cu Aruba mes a permiti den e formula pa representacion di Aruba y Curacao den Parlamento di Antia.

E cambio di reparticion original di asiento den Parlamento di Antia a wordo transforma den 12-8 na fabor di Curacao, loke a haci cu den Parlamento di Antia, Aruba a bira un minoria.

Esaki a silencia e lucha di Aruba pa autonomia durante e prome parti di Siglo 21 y hasta por bisa cu e voz di Aruba a wordo silencia te na momento cu Betico Croes a lanza e lucha di Status Aparte na entrada di e ultimo 25 aña di Siglo 20 y asina logra un pais autonomo den Reino Hulandes entrante Prome di Januari 1986.

E desaroyonan den Parlamento di Antia Hulandes, a duna prueba cu Parlamento ta central den gobernacion cu mester ta basa riba bienestar di Pueblo di un pais.

Dia Prome di Januari 1986 Aruba mira e lucha pa Status Aparte corona den e prome constelacion di Parlamento di Aruba, cu no a wordo eligi a base di e lucha cu Aruba a hiba y no tabata basa riba e pakete cu cual Aruba a hiba su lucha di Status Aparte..

E prome 25 aña di Siglo 21, a destrui e base financiero di Aruba cu creacion di debe pa e pais, pero mas ainda cu un tendencia sumamente peligroso den cual e balor di Parlamento a bay perdi.

E Budgetrecht di Parlamento, e arma cu Parlamento tin pa controla placa di Pueblo, a wordo kibra na momento cu na 2009, Gobierno Mike Eman a tuma asiento y Parlamento a duna Benny Sevinger y Mike Eman e posibilidad pa uza 1.6 Biyon Florin pa proyectonan cu lo no por a wordo controla dor di Parlamento.

Di e forma aki e derecho di representenan di Pueblo pa vigila placa di Pueblo di Aruba a wordo destrui den un situacion cu a habri porta pa despues Gobierno Mike Eman haya poder pa firma un acuerdo pa habri refineria cu Nicolas Maduro a base di un contracto cu Goberno Mike Eman a tene scondi pa Parlamento di Aruba, cu e mayoria di AVP cu a permiti atrobe pa Gobierno silencia Voz di Oyueblo, representa directamente den Parlamento.

Na hopi ocasion DIARIO a bay contra e sistema cu Parlamento no ta honra su deber enfrente Pueblo, loke sigur ta bini dilanti den e cantidad di scandalnan cu for di inicio di Siglo 20 a presenta nan mes.

Manera DIARIO ya a splica e scandal grandi cu a resulta den condena di prison pa gobernantenan di Gobierno Eman, tabata basa riba proyectonan a base di e sistema di asina yama “deelprojecten”manera Bo Aruba tambe a conoce.

Pa Ley Parlamento ta ricibi tur documento y ta ricibi asistencia di Algemene Rekenkamer Aruba pa e por controla kico Gobierno ta haci y Parlamento tin e deber di controla tambe tur decision cu Ministronan tuma.

Si Parlamento haci su trabou, ta imposibel cu Parlamento no a tuma nota cu Benny Sevinger tabata abusa di su poder como Ministro encarga cu terenonan di Aruba y cu awor Glenbert Croes ta wordo sospecha y acusa di acepta soborno pa permiso.

Ya condena a cay pa otro casonan di abuso di confianza di Pueblo durante gobernacion di AVP, cu ta permiti te awe pa e accion di miembro di AVP, condena na prison dor di Huez cu castigo cu a wordo confirma dor di Corte di Husticia, keda den Parlamento di Aruba.

Na momento cu Glenbert Croes a wordo deteni, e no por a yama su mes mas Ministro di Aruba pero mester a firma su retiro. E lo mester wordo reemplaza dor di un persona den MEP, cu sea ta nombra un persona pa reemplaza Glenbert Croes of ta entrega e tareanan di Glenbert Croes na otro persona.

Si mester nombra un Ministro nobo, Benny Sevinger tambe mester duna su aprobacion como Miembro di Parlamento pa e Ministro nobo por tuma asiento.

Pues Benny Sevinger, cu a wordo condena dor di Huez y por wordo yama delincuente oficialmente, como Miembro di Parlamento mester bay di acuerdo pa un persona cu ta reemplaza Glenbert Croes, cu awor ta sospechoso.

Na caminda pa un eleccion nobo di Parlamento, despues cu Gobierno Wever-Croes a cay pasobra tabata tin un Presidente di Parlamento firme, pregunta serio entorno democracia na Aruba ta surgi!