Aruba tin mas venezolano per capita cu cualkier otro pais na mundo

Segun rapport di Amnesty International

 *Ta calcula cu na 2023 a yega te na 17.000 venezolano indocumenta 

ORANJESTAD (AAN):  Segun e recien rapport di Amnesty International: 'Sin proteccion

desvelando brechanan den e proteccion di venezolanonan na Aruba', aproximadamente 7,77 miyon venezolano a huy for di nan pais desde 2015, loke ta representa 25% di henter e populacion di e pais.

            Nan a indica cu Aruba ta un pais constituyente di Reino hulandes, hunto cu Corsou, Sint Maarten y Hulanda, y el a ratifica tratadonan internacional tocante di derechonan humano, cu ta brinda derechonan y obligacionnan specificamente den e contexto di personanan cu ta busca asilo.

            Aruba, por ehemplo, ta mara na e Convencion di Nacionnan Uni relaciona cu e Status di Refugiadonan (UN Refugee Convention) y mester respeta e obligacionnan cu e convencion aki ta establece, incluyendo e principio di non-refoulement, cu ta prohibi cualkier traspaso di individuonan na luganan caminda nan ta core riesgo di persecucion, tortura of otro violacionnan serio di derechonan humano.

            Tin mas tratadonan, manera e Convencion Europeo pa Proteccion di Derechonan Humano y Libertadnan Fundamental (European Convention for the Protection of Human Rights and Fundamental Freedoms – ECHR) y e Convencion contra Tortura y Otro Tratamento of Castigo Cruel, Inhumano of Degradante (Convention against Torture and Other Cruel, Inhuman or Degrading Treatment or Punishment – CAT) cu tambe ta aplica na Aruba.

            Aruba ta ubica den Caribe, na un distancia di 24 kilometer for di e costa venezolano, y e ta comparti lasonan historico cu Venezuela. Aruba tin mas venezolano per capita cu cualkier otro pais na mundo, y ta calcula cu na 2023 e tabata hospeda 17.000 venezolano indocumenta, loke ta ascende na 159 individuonan desplasa pa cada 1.000 residente.

            Cifranan oficial di venezolanonan na Aruba no ta disponibel pa publico pa medio di fuentenan di gobierno; e Oficina di e Alto Comisario pa Derechonan Humano di Nacionnan Uni (UN High Commissioner for Human Rights – OHCHR) ta esun cu ta calcula e estimacionnan, e rapport di Amnesty International a señala.