Hospital a firma MoU cu Matchis, pa registra donantenan di stem cells

ORANJESTAD(AAN): Diahuebs na Horacio Oduber Hospital, a tuma lugar firmamento di un Memorandum of Understanding (MoU) entre Hospital y e compania Hulandes Matchis,

cu ta un compania cu ta recluta donante di stem cells y ta e unico compania na Hulanda cu ta registra donantenan.

   Durante un conferencia di prensa director di HOH Jacco Vroegop a trece indica cu representantenan di Matchis a papia cu Gobierno, cu ta sostene firmamento di e MoU.

“Despues di firma e MoU nos ta bay haci palabracionnan cu otro riba con nos ta bay percura pa bin mas concientizacion riba e isla riba pakico ta importante pa hende registra nan mes como donante di stem cells”.

   Di otro banda nos ta spera cu hende hoben tambe por wordo stimula pa bay yuda, segun Vroegop.

El a sigui bisa cu mundialmente tur aña tin un cantidad di hende cu lamentablemente ta haya cancer di sanger (leukemia) y esey ta inclui Aruba tambe.

E director a splica cu hopi biaha e mucha of adultonan aki mester wordo manda pa Hulanda of otro paisnan pa ricibi tratamento.

“Ta bastante dificil pa percura pa e pashentnan aki ricibi e tratamento adecuado”.

Mayoria ta haya chemoterapia of  radioterapia, pero esaki ta causa bastante daño na entre otro e celnan.

Un di e solucionnan pa cura e personanan aki, ta pa nan haya un donante di stem cell, segun Vroegop, kende a indica cu pa esaki funciona bon, bo mester tin un database den cual e nombernan di e donantenan ta para, via cual bo por busca un ‘match’.

E director a splica cu lamentablemente e database aki no ta yena suficiente, cu personanan di nos region.

El a splica cu e intencion awor ta pa haya hopi mas donante di stem cell di nos region pa yena e database, pa asina mas pashent posibel por wordo yuda di nan tin leukemia of otro tipo di cancer di sanger.

.