Na 2019 prome cu entrada di Covid-19 DIARIO a dirigi Aruba pa era nobo
*Con a reemplaza, ta reemplaza y lo reemplaza hende den mundo programa?
*DIARIO a avisa pa e problema pa fin di petroleo y epoca comercial nobo
ORANJESTAD (AAN) — “Na caminda pa 2020”, tabata e nomber cu DIARIO a duna na e rubrica na 2019, cu tabata basa riba e esencia di programanan di prioridad mundial mas urgente.
E preocupacion mas grandi di dirigentenan mundial riba tur tereno, tabata e hecho cu hende a crea pa su mes un amenaza directo, cu ta Inteligencia Artificial, cu ya a yega na su fase determinante, ya cu hende a cuminsa puntra su mes, con e por controla e mundo computeriza cu el a crea.
Mientras mundo tabata marcha na e momento pa alcansa 2020, riba tereno internacional bukinan, programanan di television y proyectonan a cuminsa mira luz pa adverti hende contra e culminacion di e epoca, den cual mundo lo tabata tin como opositor principal, su propio produccion intelectual.
Programanan computarisa a haci posibel pa hende, a base di coleccion di informacion, por a atende cu informacionnan den un tempo sumamente cortico.
Si por ehempel un estudio propio di un materia, tabata rekeri hende leza cantidad di buki y haci uzo di diferente metodonan pa maneha informacion, e forma cu hende a logra compila informacion pa medio di sistemanan computariza, a haci cu hende a crea un mundo di informacion alcansabel via programacionnan especial.
Sin tabata conoci ainda cu loke tabata spera mundo na 2020, DIARIO a prepara Aruba pa loke lo a causa e cambio mas grandi den e tempo mas cortico den e historia moderno di Aruba.
Kico lo pasa cu comunicacion, cu ta base di sociedad moderno?
Haciendo uzo di teconologianan moderno pa investigacion, DIARIO a presenta Aruba cu e serie “na caminda pa 2020” y sin cu nos mes tabata na haltura, pa 2020, cu lo a cambia historia mundial.
Covid-19 a bati na porta y Aruba por a cera conoci cu e arma mas poderoso di hende den tempo moderno, cu ta Inteligencia Artificial.
Ta a base di e sistemanan computerisa moderno, na 2020, na momento cu Covid-19 a presenta, mundo por a contesta cu compilacion di informacion internacional cu velocidad pa asina introduci medidanan contra e monstruo “Covid-19”pero na mes momento produci medicamentonan y reparti esaki na forma mundial.
Aparte di e informacion di e cambio grandi den tecnologia, DIARIO a presenta na Aruba cambionan cu por a wordo spera den e podernan mundial di gobernacion, cu lo a crea situacionnan mundial nobo.
E cambionan grandi den produccion industrial, e cambio den necesidad di trahadornan den un mundo cu tecnologia lo a permiti crea “robot”cu ta reemplasa trabou di hende, a wordo entrega na Aruba cu e advertencia grandi cu 2025 lo a marca introduccion di un epoca nobo.
Riba tereno comercial, ya prome cu 2020 DIARIO a atende cu un aspecto sumamente importante, cu tabata e cambionan grandi den composicion di poblacion mundial, cu lo mester a tene cuenta cu salida activo di e generacion cu a nace despues di Segunda Guera Mundial, y a dispone di e posibilidadnan di e “Epoca di Oro” cu Guera Mundial a produci y a habri caminda pa mas educacion personal, pa mas cambio social entre otro.
Awe na 2025, DIARIO ta entrega Aruba, prueba di veracidad di su informacionnan na nivel mundial halto, cu cooperacion di expertonan internacional pa asina guia Aruba riba tur tereno cu esaki por nifica.
Na 2025 hende ta confronta e retonan pa cual a spierta. Ekiponan medico pero tambe compilacion di informacionnan personal di hende, cu ta haci posibel pa hende por lucha pa su salud y su bienestar.
Na mes momento hende mester biba cu aparatonan cu a reemplaza hende pero atrobe ta exigi adaptacion na exigencianan nobo di un mercado y di un mundo cu tanto conflicto, basa riba problemanan cu a tranca manera e salida di petroleo.
E Guera di Ukraine a resumi e situacionnan mundial explosivo cu awe ainda mester resolve na un mundo, marca awe pa Union Europeo cu retonan nobo cu lo afecta Aruba como partner den Reino Hulandes y lo duna e pensamento di Statuut “Steunend op Eigen kracht doch met de wil elkander bij te staan” basa riba realidad di autonomia , e lugar central den relacionnan den Reino.
Central ta keda, sinembargo, e balor di hende, cu a introduci computer cu ta amenaza hende, cu na 2025 manera a keda proba, por perde den espacio pero wordo rescata.
E problema grandi di hende lo keda e guera pa mas y mas poder, mientras naturaleza ta sigui cambia sin piedad como un contesta na hende, cu awe a perde e derecho di respet pa su informacionnan personal, cu ta base di negoshi di banconan di informacion, cu tur hende mester uza y cu ta hasta fuente pa DIARIO por sigui informa Aruba cu e calidad internacional cu a marca su produccion!
E derechonan di hende den un mundo programa, ta e contesta cu te awor ningun programa di computer por entrega, manera tantisimo conferencia a demostra pero si ta haci cu uzo di informacion tocante necesidad y preferencia di hende, por wordo uza pa manipula hende!
