Wega politico infantil cu prijs mundial di petroleo

The content originally appeared on: Diario

Mientras OPEC a bolbe subi prijsnan di petroleo mundial ayera — *Accion di AVP na tankstation ta duna prueba di nivel abou di politica


ORANJESTAD(AAN)—Den tanto problema cu tin na mundo, ayera DIARIO mester a busca sombra di un mata grandi pa relaha di un noticia cu nos a ricibi.

Mainta tempran, mientras pa informa un Pueblo angustia nos tabata na careda pa mira con e accion di sindicatonan lo ta, e partido berde di Aruba a percura pa otro cañonazo.

E politico bieu di AVP cu a bolbe cas. Adri de Palm hunto cu dos persona, a convoca e rueda di prensa den cual a wordo mustra con Gobierno di Evelyn Wever-Croes a subi prijs di gasolin loke ta afecta henter e pais.

E grupo cu aparentemente kier a yuda na aumenta e ambiente politico na Aruba, a mustra riba tur e resultadonan di prijs di petroleo pa e pais.

Si bay tras di e protesta di e grupo politico berde cu a uza tank station pa tene un conferencia di prensa, mester conclui cu Evelyn Wever-Croes tin tanto poder cu e por subi prijs di petroleo mundialmente.

Si esaki no ta e caso, y si sigui e accion ridiculo di  AVP, Evelyn Wever-Croes den secreto mester a bira productor di petroleo, miembro di OPEC Plus, cu ta subi y baha prijs di petroleo rond mundo.

Ta increibel cu oposicion di Aruba por a yega asina leu cu ta critica gobierno di Aruba pasobra prijs di petroleo mundial a subi, ta organisa un show na tankstation pa mira con Mike por haya voto aunke ainda eleccion ta leu.

Ta increibel cu un partido politico manera AVP, cu ta papia di ta partido di hende sabi y inteligente, por hunga un wega manera a wordo hunga ayera ora a uza nan miembronan di partido pa haci pueblo kere cu ta Gobierno Wever-Croes ta dicidi riba e prijs di petroleo mundialmente.

Mientrastanto ayera OPEC a bolbe aumenta prijs di petroleo pero aparentemente pa AVP esaki no ta un asunto importante pa tene na consideracion pasobra tur loke ta importante pa AVP ta, pa crea mas intrankilidad den Pueblo pa asina den angustia falso, Mike por haya chens di busca mas voto pa asina e por bolbe den gobernacion y crea otro debe nacional, mas peso di PPP y tur loke el a laga atras como herencia pa Aruba.