“WEB su maneho ta pa cumpli cu e demanda di energia di nos pais”

The content originally appeared on: Diario

Director di WEB Aruba NV, Alfredo Koolman:

ORANJESTAD (AAN) – Alfredo Koolman, director di WEB Aruba NV, den entrevista cu DIARIO a expresa cu WEB su maneho ta pa cumpli cu e demanda di energia nos pais.

            Koolman a splica cu p’esey nan ta bay den cooperacion cu otro stakeholders den comunidad, por ehemplo cu hotelnan, pa no bay den “load sharing” cu no ta su maneho. “P’esey nos ta cumpli cu e demanda”, director di WEB a enfatiza.

            “Esaki ta importante y ta un desaroyo mundial pa hopi tempo caba, pero sigur den e temponan aki cu nos ta mira e cambionan climatologico, evidentemente, toch tin e parti cu ta motiva nos ciudadania pa sea conciente di con pa uza energia, pa motibo cu temperatura ta subi un pa dos grado pa dia, y di esey nos no tin control riba dje”, Koolman a señala.

            El a agrega cu WEB ta cumpli cu e demanda, pero conhuntamente nan por haya ayudo. Nan ta hay’e di hotel y ta spera di comunidad tambe e cooperacion eynan di bira mas conciente riba su consumo di energia, por ehemplo adapta uso di luznan anochi pa motibo di seguridad, etc. Finalmente, door di acumula como comunidad por maneha e situacion cu tin na WEB.

            Señor Koolman a señala cu Aruba compara cu otro paisnan, e produccion di coriente tin bon continuidad y ta mantene na normanan cu e compania ta exigi di su mes, pa mantene un suministro garantiza. “Nos ta hopi miho cu otro lugarnan, por ehemplo na Sint Maarten aworaki tin un red hopi grandi y p’esey e capacidad di e boiler a kima, etc.

            Na Curacao, por ehemplo, tin ‘schakel programma’ cu nos si no tin pa motibo di produccion. Nos sa cu nos compania ruman tin su retonan cu e grid, pero di parti di produccion nos lema ta cu nos ta cumpli cu e demanda, anto nos ta traha nos plannan y ehecuta nan di manera cu Aruba por garantiza su produccion di energia”, señor Alfredo Koolman, director di Aruba WEB NV a conclui.