WEB Aruba NV tin como meta pa baha uso di Heavy Fuel Oil y baha e emision di CO2

The content originally appeared on: Diario

Asja Dongen

ORANJESTAD (AAN) – Relacionista Publico di WEB Aruba NV, Asja Dongen, tambe a hiba palabra den e conferencia di prensa yama pa Utilities NV, NV Elmar y WEB, tocante e aumento di tarifa pa awa y coriente.

            Dongen a comenta cu nan ta haciendo hopi esfuerzo pa acelera e uso di energia renovabel na Aruba, locual no ta por nada. Di un banda e tin e meta di baha e uso di e Heavy Fuel Oil (HFO), pero di otro banda tambe, pa baha e emision di CO2.

            “Como Isla, como Aruba, nos tin cu cumpli cu acuerdonan internacional, y esey tambe ta e importancia di e ampliacion. Pa nos, cu ta den e mundo di utilidad y produccion di awa y energia, nos por compronde tur esey. Pero nos por imagina nos cu pa e pueblo eyfo, pa comunidad e ta un materia hopi complica. Dus, pa e motibo ey, nos pa medio di programanan di informacion di ‘Pop up news’ na inicio di e aña aki, nos a cuminza produci un serie di siete programa caminda nos ta splica ampliamente, e strategia di energia na un forma hopi simple y comprendible. Y aunke cu nos a publica nan caba, nos kier recomenda comunidad pa tira un bista riba nan, atrobe”, Asja Dongen a splica. Por haya e informacion via e website di WEB, of via nan canal di YouTube, y riba nan pagina di Facebook.

            E dama referi na e palabra eficiencia, cu a wordo menciona varios biaha durante e conferencia di prensa aki.

            “Nos a trata di splica kico nos, como compania, di nos banda. E esfuerzonan cu nos a haci. Señor Koolman a menciona e ora ey cu desde 2006 nos a bin cu proyectonan, nos a inverti, pa baha e cantidad di barinan di combustible cu nos ta uza pa dia. Pero na final, si bo wak bon, e eficiencia berdadero ta cada gota di awa of cada kilowatt di coriente, cu bo no uza, of cu bo no produci. Anto, eynan comunidad por yuda nos. Aki na Aruba nos a custumbra, vooral e situacion di awa, cu nos no conoce scarcedad. Ki ora cu kier, bo por habri e cranchi y awa ta basha y mi ta kere cu comunidad mester ta conciente di nan consumo di awa.

             Mi ta kere cu si nos puntra hendenan riba caya, cuanto cube di awa nan ta uza pa luna, nan no sa directamente cuanto esey ta. Pero mas conciente bo bira, mas esfuerzo bo haci pa spaar awa, y den esey nos kier yuda boso”, e PR di WEB Aruba NV a subraya.

            El a agrega cu riba WEB su website tin hopi tip con pa spaar awa den e cas, cushina, baño, etc. Nan tin un calculator tambe via e website, cu ta yuda e consumidor ta conciente di cuanto cube e ta uza. E consumidor por yene y hasta e calculator por bise cuanto su consumo average, segun standardnan di Aruba y internacional ta, si e ta mas abao of mas halto.